آزاد کشمیر کی موجودہ صورتحال ایک نئے مرحلے میں داخل ہوگئی ہے، جہاں رات 12 بجے کے بعد ریاست کے تمام انٹری پوائنٹس مکمل طور پر بند کردیے گئے ہیں۔ اس اقدام کے نتیجے میں آزاد کشمیر آمد و رفت پر سخت پابندیاں عائد ہوگئی ہیں۔ مشترکہ عوامی ایکشن کمیٹی کے رکن امتیاز اسلم نے عوام سے اپیل کی ہے کہ وہ راشن اور بنیادی ضروریات کا سامان اکٹھا کرلیں کیونکہ انٹری پوائنٹس طویل عرصے کے لیے بند رہنے کا امکان ہے۔ ذرائع کے مطابق، آزاد کشمیر کے 20 بڑے شہروں کو مکمل طور پر بند کر دیا گیا ہے اور کاروباری و تجارتی سرگرمیاں معطل ہیں۔ اس دوران عوامی ایکشن کمیٹی نے اپنا چارٹر آف ڈیمانڈ بھی پیش کردیا ہے جس میں درج ذیل نکات شامل ہیں۔ • حکمران اشرافیہ کی مراعات کا خاتمہ۔ • مہنگائی، بیروزگاری اور لوڈشیڈنگ کے خلاف اقدامات۔ • سرکاری ملازمین کے مسائل کا حل۔ • آزاد کشمیر کو معاشی و سیاسی خودمختاری کی فراہمی۔ • عدالتی و انتظامی اصلاحات اور کرپشن کے خلاف سخت کارروائیاں۔ • نوجوانوں کو روزگار کے مواقع اور تعلیمی مسائل کا فوری حل۔ عوامی ایکشن کمیٹی نے کہا ہے کہ مطالبات پورے نہ ہوئے تو احتجاج کا دائرہ مزید وسیع کیا جائے گا اور تحریک کو بھرپور انداز میں جاری رکھا جائے گا۔ ماہرین کا کہنا ہے کہ انٹری پوائنٹس کی بندش اور شہروں کے مکمل لاک ڈاؤن کے باعث نہ صرف تجارتی سرگرمیاں متاثر ہوں گی بلکہ روزمرہ زندگی بھی مشکل ہوجائے گی۔