بھارتی فلم دھریندر میں پاکستان پیپلز پارٹی کے پرچم اور شہید محترمہ بے نظیر بھٹو کی تصاویر کے غیر مجاز استعمال پر مقدمہ اندراج کے لیے عدالت سے رجوع کرلیا گیا۔
ڈسٹرکٹ اینڈ سیشن عدالت جنوبی میں پی پی کارکن عامر کھوسو نے فلم پروڈیوسر، ڈائریکٹر اور اداکاروں سمیت دیگر کے خلاف مقدمہ کے لیے درخواست دائر کردی۔
درخواست گزار کے مطابق سوشل میڈیا پر بھارتی فلم کا ٹریلر دیکھا جس میں پاکستان پیپلز پارٹی کی ریلیوں، پارٹی پرچم اور شہید محترمہ بے نظیر بھٹو کی تصاویر بلا اجازت شامل کیے گئے۔
ٹریلر میں پاکستان پیپلز پارٹی کے خلاف دہشت گردوں کی حمایت کرنے والی جماعت کے طور پر پروپیگنڈا کیا گیا ہے، فلم کی تشہیری مہم میں لیاری کو دہشتگرد زون کے طور پر دکھایا گیا ہے۔
لیاری کے رہائشیوں کے خلاف بے بنیاد اور اشتعال انگیز تاثر دیا گیا ہے، فلم کا ٹریلر پی پی قیادت اور کارکنان کے خلاف اشتعال پھیلانے کا سبب بن رہا ہے، مقدمہ اندراج کے لیے درخواست دی لیکن پولیس مقدمہ درج کرنے سے انکاری ہے۔
درخواست گزار نے استدعا کی کہ پولیس کو مقدمہ درج کرنے اور متعلقہ ایس ایس پی کو شفاف تحقیقات کی نگرانی کا حکم دیا جائے۔
درخواست میں بھارتی فلم پروڈیوسر، ڈائریکٹر اور اداکار سنجے دت، رنویر سنگھ اور اکشر کھنہ سمیت دیگر اداکاروں کو بطور ملزم نامزد کیا گیا ہے۔