اسلام آباد ہائیکورٹ کے جسٹس طارق جہانگیری نے اپنے خلاف ڈگری تنازع سے متعلق جاری عدالتی کارروائی کو وفاقی آئینی عدالت میں چیلنج کرنے کا فیصلہ کر لیا ہے۔ اس سلسلے میں انہوں نے تین سینئر وکلا پر مشتمل قانونی ٹیم بھی تشکیل دے دی ہے۔ ذرائع کے مطابق معروف قانون دان اکرم شیخ اور بیرسٹر صلاح الدین اسلام آباد ہائیکورٹ میں جسٹس طارق جہانگیری کی جانب سے کیس کی پیروی کریں گے۔ قانونی ذرائع کا کہنا ہے کہ اسلام آباد ہائیکورٹ کے آرڈر کے خلاف وفاقی آئینی عدالت میں باقاعدہ اپیل دائر کی جائے گی جبکہ اسلام آباد ہائیکورٹ میں بھی جسٹس طارق جہانگیری کی جانب سے متعلقہ درخواستیں دائر کیے جانے کا امکان ہے۔ یاد رہے کہ گزشتہ سماعت کے دوران جسٹس طارق جہانگیری نے کیس کی سماعت کرنے والے بینچ میں چیف جسٹس اسلام آباد ہائیکورٹ جسٹس سرفراز ڈوگر کی موجودگی پر اعتراض اٹھاتے ہوئے بینچ پر عدم اعتماد کا اظہار کیا تھا، جس کے بعد معاملہ مزید سنگین صورت اختیار کر گیا تھا۔