پرونشل ڈیزاسٹر مینجمنٹ اتھارٹی نے خیبر پختونخوا کے بیشتر اضلاع میں گرج چمک کے ساتھ بارش اور بالائی و پہاڑی علاقوں میں برفباری کی پیشگوئی کرتے ہوئے ضلعی انتظامیہ اور متعلقہ اداروں کو پیشگی حفاظتی اقدامات کی ہدایات جاری کر دی ہیں۔ پی ڈی ایم اے کے مطابق موسمی صورتحال کے پیشِ نظر پرونشل ایمرجنسی آپریشن سنٹر کی جانب سے تمام متعلقہ اضلاع کو الرٹ جاری کیا گیا ہے۔ چترال، دیر، سوات، شانگلہ، کوہستان، کولائی پالس، مالاکنڈ، بونیر، مانسہرہ، بٹگرام، طورغر، ایبٹ آباد، ہری پور، کرم، خیبر، باجوڑ اور مہمند میں 20 سے 22 دسمبر کے دوران بارش اور گرج چمک کا امکان ہے۔ ادارے کے مطابق مردان، نوشہرہ، پشاور، چارسدہ، کوہاٹ، ہنگو، اورکزئی، کرک، بنوں، لکی مروت، ٹانک، ڈی آئی خان اور شمالی و جنوبی وزیرستان میں بھی اسی دوران بارش کی پیشگوئی کی گئی ہے۔ پی ڈی ایم اے کا کہنا ہے کہ برفباری کے باعث ناران، کاغان، دیر، سوات، مالاکنڈ، کوہستان، مانسہرہ، ایبٹ آباد، شانگلہ اور گلیات میں سڑکیں بند ہونے یا پھسلن کا شکار ہونے کا خدشہ ہے جبکہ پہاڑی علاقوں میں لینڈ سلائیڈنگ اور برفانی تودے گرنے کا خطرہ بھی موجود ہے۔ ترجمان پی ڈی ایم اے کے مطابق متعلقہ اداروں کو نکاسی آب کے نظام کو فعال رکھنے، بل بورڈز اور کمزور ڈھانچوں کو محفوظ بنانے اور دریاؤں، ندی نالوں اور برساتی نالوں کی مسلسل مانیٹرنگ کی ہدایات جاری کر دی گئی ہیں۔ پی ڈی ایم اے نے سیاحوں اور مسافروں سے اپیل کی ہے کہ دورانِ برفباری سفر سے گریز کریں یا ناگزیر صورت میں پانی، خوراک، ادویات اور گرم کپڑے ساتھ رکھیں۔ عوام کو بھی ہدایت کی گئی ہے کہ تیز ہوا اور گرج چمک کے دوران بجلی کے کھمبوں، اشتہاری بورڈز اور کمزور عمارتوں سے دور رہیں۔