گورنر خیبر پختونخوا فیصل کریم کنڈی نے وزیر اعلیٰ پنجاب مریم نواز شریف سے مطالبہ کیا ہے کہ سابق وزیراعظم عمران خان کو اڈیالہ جیل سے کسی دوسرے صوبے کی جیل میں منتقل کیا جائے تاکہ آئے روز اسلام آباد کو بند کرنے جیسے اقدامات سے بچا جاسکے اور عوام کو مشکلات کا سامنا نہ کرنا پڑے۔ ادھر خیبر پختونخوا کی بگڑتی معاشی صورتحال پر گورنر کے پی فیصل کریم کنڈی نے وزیراعلیٰ سہیل آفریدی پر کھل کر تنقید کی ہے۔ گورنر کے پی کا کہنا تھا کہ صوبہ شدید مالی بحران کا شکار ہے، ترقیاتی منصوبے رُکے ہوئے ہیں اور عوام بنیادی سہولیات سے محروم ہو رہے ہیں۔ فیصل کریم کنڈی نے کہا کہ صوبائی حکومت معاشی بدحالی کی ذمہ داری قبول کرنے کے بجائے سیاسی بیانات پر اکتفا کر رہی ہے، جبکہ عوام مہنگائی، بے روزگاری اور بدانتظامی سے تنگ آچکے ہیں۔ گورنر کے پی نے مطالبہ کیا کہ صوبائی حکومت فوری طور پر معاشی اصلاحات کرے اور وفاق کے ساتھ مل کر عوامی مسائل کے حل کیلیے سنجیدہ اقدامات اٹھائے، بصورت دیگر حالات مزید خراب ہونے کا خدشہ ہے۔