آئی سی سی انڈر 19 ورلڈ کپ میں پاکستان کو اپنے پہلے ہی میچ میں انگلینڈ کے خلاف 37 رنز سے شکست کا سامنا کرنا پڑ گیا۔ ہرارے میں کھیلے گئے اس میچ میں انگلینڈ نے پہلے بیٹنگ کرتے ہوئے 210 رنز بنائے جبکہ پاکستان کی ٹیم 211 رنز کے ہدف کے تعاقب میں 46.3 اوورز میں 174 رنز پر آؤٹ ہو گئی۔ پاکستان کی جانب سے کپتان فرحان یوسف نے شاندار بیٹنگ کا مظاہرہ کرتے ہوئے 86 گیندوں پر 65 رنز اسکور کیے، تاہم وہ اپنی ٹیم کو فتح دلانے میں کامیاب نہ ہو سکے۔ جب تک وہ کریز پر موجود رہے پاکستان کو جیت کی امید رہی، لیکن 41ویں اوور میں ان کے آؤٹ ہوتے ہی میچ کا پانسہ انگلینڈ کے حق میں پلٹ گیا۔ پاکستان کو اننگز کے آغاز میں ہی مشکلات کا سامنا کرنا پڑا جب اوپنرز سمیر 10 اور محمد شایان ایلیکس گرین کی گیندوں پر پویلین لوٹ گئے، جبکہ عثمان خان جیمز منٹو کے ہاتھوں ایل بی ڈبلیو آؤٹ ہو گئے۔ 28 رنز پر تین وکٹیں گرنے کے بعد پاکستان کی بیٹنگ لائن دباؤ کا شکار رہی اور ایک موقع پر اسکور 85 رنز پر چھ وکٹیں ہو چکا تھا۔ انگلینڈ کے فاسٹ بولرز کے ساتھ ساتھ اسپنر فرحان احمد نے بھی پاکستانی بیٹسمینوں کو خاصا پریشان کیے رکھا۔ ساتویں وکٹ پر فرحان یوسف اور عبدالسبحان (14 رنز) کے درمیان کچھ مزاحمت دکھائی گئی، تاہم 133 کے مجموعی اسکور پر عبدالسبان کے رن آؤٹ ہونے کے بعد مشکلات مزید بڑھ گئیں۔ انگلینڈ کی جانب سے ایلیکس گرین، جیمز منٹو اور اسپنر ریلفی البرٹ نے اہم وکٹیں حاصل کیں۔ اس سے قبل ٹاس جیت کر پاکستان نے انگلینڈ کو بیٹنگ کی دعوت دی۔ انگلینڈ کی جانب سے کیلپ فائل کونر نے 66 رنز کی ذمہ دارانہ اننگز کھیلی اور ریلفی البرٹ کے ساتھ 103 رنز کی اہم شراکت قائم کی، جس کی بدولت انگلینڈ 210 رنز بنانے میں کامیاب رہا۔ پاکستان کی جانب سے لیگ اسپنر احمد حسین نے 3 وکٹیں حاصل کیں جبکہ مومن قمر نے 2 اور فاسٹ بولرز علی رضا اور عبدالسبحان نے دو، دو کھلاڑیوں کو آؤٹ کیا۔