بیوٹی پارلرز، جلد کی نگہداشت کے کلینکس اور ہیلتھ کلبز میں استعمال ہونے والے درآمدی خام مال اور مشینری پر کسٹم ڈیوٹی میں کمی کا امکان ظاہر کیا جا رہا ہے۔ ذرائع کے مطابق کسٹم نوٹیفکیشن نمبر 1151 اور 1152 کے تحت ڈیوٹی کی شرح میں 2 سے 5 فیصد تک کمی کی تجویز زیر غور ہے۔ مجوزہ تبدیلیوں کے مطابق بیوٹی پارلرز میں استعمال ہونے والے میک اپ اور دیگر خام مال پر ڈیوٹی 44 فیصد سے کم ہو کر 40 فیصد تک کیے جانے کا امکان ہے۔ اسی طرح سن اسکرین، سن بلاک اور بالوں کی نگہداشت کے خام مال پر بھی ڈیوٹی میں کمی متوقع ہے۔ ذرائع کا کہنا ہے کہ مردانہ سیلونز میں استعمال ہونے والی شیونگ کریم، آفٹر شیو لوشن، فیس واش اور دیگر مصنوعات پر ڈیوٹی 40 فیصد سے کم کر کے 35 فیصد تک کی جا سکتی ہے۔ اسی طرح ہیلتھ کلبز اور جم میں استعمال ہونے والی مشینری، آلات اور پرزہ جات پر بھی کسٹم ڈیوٹی 35 فیصد تک مقرر کیے جانے کی تجویز زیر غور ہے۔