پاکستان پیپلز پارٹی کی رکن سندھ اسمبلی ندا کھوڑو نے سندھ اسمبلی کے اجلاس سے خطاب کرتے ہوئے کہا ہے کہ سندھ کی آئینی شناخت کسی انتظامی فائل تک محدود نہیں ہے۔ انہوں نے واضح کیا کہ سندھ پاکستان کے خلاف نہیں، بلکہ قیامِ پاکستان میں اہم کردار ادا کرنے والا پہلا صوبہ ہے، اور 1943ء کی تاریخی سندھ اسمبلی کی قرارداد پاکستان کے قیام کی بنیادی تاریخ کا ایک اہم حصہ ہے۔ ندا کھوڑو کا مزید کہنا تھا کہ کاغذ پر نقشے بنائے جا سکتے ہیں، سیاسی بیانات اور پریس کانفرنسز کی جا سکتی ہیں، لیکن ان تمام اقدامات سے سندھ کے عوام کے دلوں کو تقسیم نہیں کیا جاسکتا۔ سندھ کی شناخت عوام کے دلوں میں بستی ہے جسے انتظامی فیصلوں، کسی نقشے یا سیاسی بیان تک محدود یا تقسیم نہیں کیا جا سکتا۔ انہوں نے عزم کا اظہار کیا کہ سندھ ہمیشہ اپنی صوبائی خودمختاری اور آئینی شناخت کا دفاع کرتا رہے گا۔