14 کلو سونا سمگل کرنے کی کوشش میں گرفتار ہونے والی اداکارہ رانیا راؤ نے کہا ہے کہ انہوں نے سونا چھپانے کا طریقہ یوٹیوب پر ویڈیوز سے سیکھا تھا۔انڈیا ٹو ڈے کے مطابق رانیا راؤ ایک سینیئر آئی پی ایس افسر کی بیٹی ہیں اور انہیں پانچ مارچ کو بنگلور ایئرپورٹ پر سونا سمگل کرتے ہوئے گرفتار کیا گیا تھا۔انہوں نے تقریباً ساڑھے 12 کروڑ روپے کے سونے کے بسکٹ ٹیپ کی مدد سے اپنے جسم سے چپکائے ہوئے تھے۔اداکارہ اس وقت ڈائریکٹیو آف ریونیو انٹیلیجنس کی تحویل میں ہیں اور انہوں نے پوچھ گچھ کے دوران بتایا کہ انہوں نے سونا چھپانے کا یہ طریقہ ویڈیو شیئرنگ ویب سائٹ یوٹیوب پر ویڈیوز دیکھ کر سیکھا تھا۔ان کا یہ بھی کہنا تھا کہ انہیں نامعلوم نمبرز سے فون کالز بھی موصول ہوئیں۔’مجھے مارچ میں ایک غیرملکی نمبر سے کال آئی اور پچھلے دو ہفتوں کے دوران بھی آتی رہیں۔ مجھے دبئی ایئرپورٹ کے گیٹ اے کے راستے ٹرمینل تھری پر جائیں۔ مجھے کہا گیا کہ دبئی ایئرپورٹ سے سونا اٹھانا اور بنگلورو ایئرپورٹ پر پہنچانا ہے۔‘رانیا راؤ نے یہ بھی بتایا کہ ’یہ میری پہلی کوشش تھی، میں نے کبھی اس سے پہلے دبئی سے سونا نہیں خریدا۔‘یہ بیان ان کے پچھلے بیان سے بہت زیادہ مختلف ہے جو انہوں نے انٹیلی جنس حکام کے سامنے دیا تھا۔انہوں نے انکشاف کیا کہ انہوں نے ایئرپورٹ پر چپکنے والی پٹی اور چھوٹی قینچی خریدی اور واش روم میں جا کر سونے کو اپنے جسم پر چپکا لیا۔’سونا پلاسٹک کے دو پیکٹس میں تھا، اس میں کچھ کو میں نے اپنی جینز اور جوتوں میں چھپایا اور یہ طریقہ میں نے یوٹیوب پر ویڈیوز دیکھ کر سیکھا تھا۔‘جب ان سے پوچھا گیا کہ انہیں فون پر ہدایات دینے والا کون تھا تو انہوں نے اس کو پہچاننے سے انکار کرتے ہوئے کہا کہ ’مجھے نہیں پتہ کہ وہ کون تھا اور وہ افریقی لہجے میں انگریزی بول رہا تھا۔‘ان کا مزید کہنا تھا کہ ’اس نے سکیورٹی چیکنگ کے بعد مجھے سونا دیا اور فوراً باہر نکل گیا۔ میں اس سے پھر کبھی نہیں ملی اور کبھی دیکھا بھی نہیں۔‘ رانیا راؤ کو پانچ مارچ کو سونا سمگل کرنے کی کوشش میں بنگلور ایئرپورٹ سے گرفتار کیا گیا تھا (فائل فوٹو: پی ٹی آئی)جب رانیا راؤ سے اس شخص کی جسمانی ساخت کے حوالے سے پوچھا گیا تو ان کا کہنا تھا کہ اس کا قد چھ فٹ کے قریب تھا اور رنگ گورا تھا۔‘ان کے مطابق ’مجھے ہدایت کی گئی تھی کہ سونا ایک نامعلوم شخص کے حوالے کروں۔ مجھے کہا گیا کہ باہر نکل کر سگنل کے قریب کھڑے رکشے میں سونا رکھ دوں مگر رکشے کا نمبر نہیں دیا گیا تھا۔‘33 سالہ اداکارہ جنہوں نے اپنے کیریئر کا آغاز 2013 میں کناڈا فلم ’مانیکیا‘ سے کیا وہ پیر کو دبئی سے ایمیریٹس کی فلائٹ سے بنگلور پہنچی تھیں۔اداکارہ کے ساتھ مبینہ طور پر دو افراد موجود تھے جو بریف کیسوں میں سمگل کیے جانے والا سونا اٹھائے ہوئے تھے۔ایئرپورٹ پر اداکارہ اور اُن کے ساتھیوں نے سکیورٹی تقریباً کلیئر کر ہی لی تھی کہ اس دوران انہیں ڈی آر آئی کی ٹیم نے پکڑ لیا تھا۔