"جب میں اپنی بیٹی فرال کی شادی کروں گی تو میں اس لڑکے کے گھر جا کر اسے خود دیکھوں گی، اس کے دوستوں سے ملوں گی، اس کے طرزِ زندگی اور رویے کو جانچوں گی۔ میں یہ دیکھوں گی کہ وہ دوسروں سے، خاص طور پر خواتین سے کیسا برتاؤ کرتا ہے۔ میں اس کی زبان اور بول چال پر بھی نظر رکھوں گی کہ کہیں وہ سلینگ لینگویج تو استعمال نہیں کرتا۔ اگر وہ میری بیٹی کے لیے مناسب ہوا، تب ہی میں اسے اپنا داماد بنانے کا فیصلہ کروں گی۔" پاکستانی ڈرامہ انڈسٹری کی مشہور اداکارہ، ماڈل اور میزبان فضا علی، جو ہمیشہ کسی نہ کسی وجہ سے خبروں میں رہتی ہیں، اس بار اپنی بیٹی کی شادی کے حوالے سے منفرد حکمتِ عملی کے باعث توجہ کا مرکز بن گئی ہیں۔ وہ نہ صرف اپنی شاندار اداکاری کے لیے جانی جاتی ہیں بلکہ ان کی بے باک گفتگو بھی اکثر سرخیوں میں جگہ بنا لیتی ہے۔ @realfizaali #fizaali #tiktok @Faraal fiza ♬ original sound - Fiza Ali حالیہ دنوں میں، وہ اپنے مارننگ شو میں کھل کر بولتی نظر آئیں اور بیٹی فرال کے لیے شوہر منتخب کرنے کے حوالے سے اپنا تفصیلی نظریہ پیش کیا۔ ان کے مطابق، وہ روایتی طریقے سے رشتہ طے کرنے کے بجائے خود اپنی بیٹی کے ہونے والے شوہر کی مکمل چھان بین کریں گی۔ ان کا ماننا ہے کہ صرف ظاہری شرافت کافی نہیں، بلکہ لڑکے کے اصل اخلاقیات اور رویے کو پرکھنا ضروری ہے۔ فضا علی کے اس بیان پر سوشل میڈیا پر زبردست ردعمل سامنے آیا۔ کچھ صارفین نے ان کی سوچ کو بے حد سراہا اور کہا کہ ہر ماں کو اپنی بیٹی کے لیے اتنی ہی سنجیدگی دکھانی چاہیے، جبکہ کچھ کا کہنا تھا کہ قسمت اور تقدیر کا بھی بڑا عمل دخل ہوتا ہے اور ہر چیز کو مکمل طور پر کنٹرول نہیں کیا جا سکتا۔ اداکارہ کی اس سوچ نے والدین کو ایک نیا زاویہ دیا ہے، جس میں صرف خاندان یا معاشرتی حیثیت کو دیکھنے کے بجائے لڑکے کی شخصیت، اس کا اخلاقی رویہ، اور دوسروں کے ساتھ اس کے سلوک کو بنیادی اہمیت دی جا رہی ہے۔ ان کے الفاظ نے ایک اہم معاشرتی بحث کو جنم دے دیا ہے کہ کیا آج کے والدین کو صرف روایتی طریقوں پر بھروسہ کرنا چاہیے یا پھر اپنے بچوں کی زندگی کے سب سے بڑے فیصلے میں مزید باریک بینی اور عقلمندی سے کام لینا چاہیے؟