دنیا کے مقبول ترین سرچ انجن گوگل میں ایک نئے دنگ کر دینے والا فیچر کا اضافہ کیا گیا ہے۔ گوگل کی جانب سے سرچ انجن کے تجرباتی اے آئی موڈ میں ایک نئے فیچر کا اضافہ کیا گیا ہے جو آرٹی فیشل انٹیلی جنس (اے آئی) ماڈل جیمنائی کی دیکھنے کی صلاحیت سے لیس ہے۔ خیال رہے کہ گوگل سرچ کا اے آئی موڈ پیچیدہ موضوعات کو آسان کرکے سمجھاتا ہے، مختلف آپشنز کا موازنہ کرسکتا ہے جبکہ مزید چیزوں کا مشورہ بھی دے سکتا ہے۔اب اے آئی موڈ سے صارفین لکھ کر پوچھنے کی بجائے تصاویر کے ذریعے زیادہ پیچیدہ موضوعات پر تفصیلی جوابات حاصل کرسکیں گے۔ مثال کے طور پر آپ کچن میں موجود کسی عجیب نظر آنے والے ٹول کی تصویر کھینچ کر پوچھ سکیں گے کہ یہ کیا ہے اور اسے کیسے استعمال کرتے ہیں؟ اور پھر آپ کو مددگار جوابات مل سکیں گے جبکہ ان سے متعلق یوٹیوب ویڈیوز بھی دیکھ سکیں گے۔یعنی آپ کسی بھی جگہ کی تصویر لیں گے تو اے آئی ٹیکنالوجی نہ صرف تصویر میں موجود تمام اشیا کو شناخت کرے گی بلکہ یہ وضاحت بھی کرے گی کہ ان کا ایک دوسرے سے کیا تعلق ہے یا ان کا مقصد کیا ہے یا انہیں کیسے استعمال کیا جاسکتا ہے۔اس فیچر کو استعمال کرنے پر متعدد متعلقہ سوالات پوری اسکرین پر نظر آئیں گے جو تصویر میں تمام اشیا سے متعلق ہوں گے۔ مثال کے طور پر اگر آپ ڈرائنگ روم کی تصویر کھینچ کر پوچھیں کہ اس کی تزئین نو کیسے کی جائے تو صرف ایک جواب نہیں ملے گا بلکہ اے آئی کی جانب سے متعدد جوابات دیے جائیں گے۔اس طرح کا فیچر چیٹ جی پی ٹی بھی موجود ہے مگر گوگل کو دہائیوں کے سرچ ڈیٹا، تصویری انڈیکس اور دیگر ڈیٹا اسٹوریج کے باعث سبقت حاصل ہے۔ واضح رہے کہ گوگل کا اے آئی موڈ فی الحال صرف امریکا میں دستیاب ہے اور اسے آنے والے مہینوں میں دیگر ممالک میں متعارف کرائے جانے کا امکان ہے۔