دبئی سے ڈھاکہ جانے والی فلائی دبئی کی پرواز جی زیڈ 501 نے جمعے کی علی الصبح ایک میڈیکل ایمرجنسی کے باعث جناح انٹرنیشنل ایئرپورٹ کراچی میں ہنگامی لینڈنگ کی۔پاکستان ایئر پورٹ اتھارٹی کے ترجمان سیف اللہ کے مطابق طیارہ صبح تین بج کر 20 منٹ پر بحفاظت لینڈ کر گیا اور بے نمبر 21 پر پارک کیا گیا۔واقعے کے فوراً بعد پاکستان ایئرپورٹس اتھارٹی کے میڈیکل آفیسر نے موقعے پر پہنچ کر متاثرہ مسافرہ مِس بیگم جو کہ بنگلہ دیشی پاسپورٹ رکھتی تھیں، کا طبی معائنہ کیا۔بعد ازاں انہیں پی اے اے کی ایمبولینس کے ذریعے فوری طور پر آغا خان ہسپتال منتقل کر دیا گیا۔ اس کے بعد صبح تقریباً 5 بج کر 15 منٹ پر طیارے میں ایک تکنیکی خرابی پیدا ہو گئی جس کے باعث تمام 159 مسافروں کو بحفاظت طیارے سے اتار کر ٹرانزٹ لاؤنج منتقل کر دیا گیا۔دبئی سے متبادل کاک پٹ عملہ اور ٹیکنیکل ٹیم کراچی پہنچی جنہوں نے طیارے کے تکنیکی مسئلے کو حل کیا۔تمام تر کلیئرنس کے بعد پرواز دوپہر ایک بج کر 21 منٹ پر اپنی منزل ڈھاکہ کے لیے روانہ ہو گئی۔