پاکستان اور بیلاروس نے دفاع، تجارت اور ماحولیاتی تحفظ سمیت متعدد شعبوں میں تعاون کے فروغ کے لیے مختلف معاہدوں اور مفاہمت کی یادداشتوں پر دستخط کیے ہیں۔سرکاری خبر رساں ادارے اے پی پی کے مطابق ان معاہدوں پر دستخط جمعے کو وزیراعظم شہباز شریف کے دورہ بیلاروس کے دوران کیے گئے۔ دستخطوں کی تقریب میں وزیراعظم شہباز شریف اور بیلاروس کے صدر الیگزینڈر لوکا شینکو بھی موجود تھے۔دونوں اطراف کے وزرا نے پہلے سے دستخط شدہ دستاویزات کا تبادلہ کیا۔ پاکستان اور بیلاروس کی حکومتوں نے ری ایڈمیشن کے معاہدے کے ساتھ ساتھ دونوں ممالک کی وزارت داخلہ کے درمیان تعاون کے ایک معاہدے پر دستخط کیے۔نائب وزیراعظم و وزیر خارجہ سینیٹر اسحاق ڈار اور بیلاروس کے وزیر داخلہ آئیوین کبراکوف نے دستاویزات کا تبادلہ کیا۔پاکستان اور بیلاروس نے دونوں ممالک کی وزارت دفاع کے درمیان تعاون کے ایک معاہدے پر دستخط کیے، اور اس حوالے سے وزیر تجارت جام کمال خان اور بیلاروس کے وزیر دفاع وکٹر خرینن نے دستاویزات کا تبادلہ کیا۔ دونوں ممالک نے جمہوریہ بیلاروس کی ریاستی اتھارٹی برائے ملٹری انڈسٹری اور دفاعی پیداوار کی وزارت کے درمیان 2025-2027 کے لیے فوجی تکنیکی تعاون کے پروگرام (روڈ میپ) پر دستخط کیے۔وزیر مواصلات عبدالعلیم خان اور بیلاروس کی ملٹری انڈسٹری کے ریاستی اتھارٹی کے وزیر دمتری پنٹس نے دستاویزات کا تبادلہ کیا۔ دورے کے دوران ماحولیاتی تحفظ، پوسٹل سروسز، بزنس سپورٹ، تجارت کے فروغ اور تجارتی اداروں کے درمیان تعاون کے لیے دوطرفہ معاہدوں پر بھی دستخط کیے گئے۔ملاقات میں دونوں رہنماؤں نے اتفاق کیا کہ زرعی شعبے اور زرعی مشینری کی تیاری کے حوالے سے مشترکہ طور پر کام کیا جائے گا۔ (فوٹو: اے پی پی)قبل ازیں وزیراعظم شہباز شریف اور صدر لوکو شینکا کے مابین جمعے کو ہی میں بیلا روس کے ایوان آزادی میں ہونے والی دو طرفہ ملاقات میں یہ فیصلہ کیا گیا کہ پاکستان سے ڈیڑھ لاکھ سے زائد تربیت یافتہ اور ہنرمند نوجوانوں کو بیلاروس بھیجا جائے گا۔وزیراعظم آفس کے میڈیا ونگ کی طرف سے جاری بیان کے مطابق پاکستان سے ہنرمند اور تربیت یافتہ نوجوانوں کو بیلاروس بھجوانے کے حوالے سے لائحہ عمل جلد ترتیب دیا جائے گا۔ ملاقات میں دونوں رہنماؤں نے اتفاق کیا کہ زرعی شعبے اور زرعی مشینری کی تیاری کے حوالے سے مشترکہ طور پر کام کیا جائے گا۔