بدھ کی سہ پہر جڑواں شہروں راولپنڈی اور اسلام آباد میں بارش، ژالہ باری اور تیز ہواؤں کے باعث گرمی کا زور تو ٹوٹ گیا، تاہم اس کے ساتھ شہریوں کے معمولاتِ زندگی بھی متاثر ہوئے۔اسلام آباد کے مختلف سیکٹرز، نواحی علاقوں اور ضلع راولپنڈی میں ژالہ باری، آندھی اور طوفان کے باعث شہریوں کی بیش قیمت گاڑیوں کے شیشے ٹوٹ گئے اور باڈی پر ڈینٹ پڑ گئے۔ اس کے علاوہ مختلف مقامات پر درخت بھی گر کر سڑکوں پر آگئے۔راولپنڈی اور اسلام آباد کی مختلف شاہراہوں اور نشیبی علاقوں میں پانی کھڑا ہو گیا، جس سے ٹریفک کی روانی بھی متاثر ہوئی۔اسلام آباد کی ضلعی انتظامیہ کی جانب سے جاری کیے گئے اعلامیے کے مطابق طوفانی بارش اور ژالہ باری کے بعد ضلعی انتظامیہ، ایم سی آئی اور سی ڈی اے کی ٹیمیں فوری طور پر متحرک ہو گئیں، جنہوں نے نشیبی علاقوں سمیت مختلف شاہراہوں پر نکاسی آب کا عمل شروع کر دیا۔ترجمان کے مطابق ژالہ باری سے ہونے والے نقصان کا جائزہ لیا جا رہا ہے، جبکہ کئی علاقوں سے گاڑیوں اور گھروں کے شیشے ٹوٹنے کی اطلاعات موصول ہوئی ہیں۔ ٹریفک پولیس کی مدد سے شہر میں ٹریفک کی روانی برقرار رکھنے کی کوششیں جاری ہیں۔ترجمان آئیسکو عاصم نذیر راجا کے مطابق تیز آندھی اور ژالہ باری کے سبب آئیسکو ریجن کے 50 سے زائد فیڈرز پر بجلی کی فراہمی متاثر ہوئی۔’آئیسکو ریجن میں گرج چمک کے ساتھ بارش اور ژالہ باری کے باعث بجلی فراہم کرنے والے 50 سے زائد فیڈرز پر حفاظتی وجوہات یا فنی خرابیوں کے باعث بجلی کی فراہمی معطل ہوئی۔‘ان کا مزید کہنا ہے کہ ’صورت حال سے نمٹنے کے لیے آئیسکو کا کمپلینٹ سٹاف فیلڈ میں موجود رہا اور جلد متاثرہ علاقوں کی بجلی بحال کر دی گئی ہے۔‘ترجمان آئیسکو نے بارش کے دوران شہریوں کو بجلی کی تاروں، کھمبوں، ٹرانسفارمرز اور میٹرز سے مناسب فاصلہ رکھنے کی تلقین کی ہے۔محکمہ موسمیات کے مطابق جڑواں شہروں میں اوسط بارش 10.52 ملی میٹر ریکارڈ کی گئی ہے۔ اسلام آباد میں سیدپور گاؤں میں 13 ملی میٹر، بوکڑہ (آئی-12) میں 12 ملی میٹر، گولڑہ (ای-11 کے قریب) میں 10 ملی میٹر اور پی ایم ڈی (ایچ-8) میں 8 ملی میٹر بارش ریکارڈ کی گئی۔راولپنڈی انتظامیہ کے مطابق نالہ لئی میں پانی کی صورت حال مکمل طور پر کلیئر ہے۔ اس وقت کٹاریاں میں پانی کی سطح 5 فٹ اور گوال منڈی میں 4 فٹ ہے، جبکہ کٹاریاں میں پری الرٹ 11.4 فٹ اور گوال منڈی میں 8.3 فٹ پر جاری کیا جائے گا۔محکمہ موسمیات کا مزید کہنا ہے کہ  مغربی ہواؤں کا سسٹم شمالی علاقوں میں داخل ہو چکا ہے جو آئندہ 24 گھنٹوں کے دوران مزید بارش اور ژالہ باری کا باعث بن سکتا ہے۔ محکمہ موسمیات نے مزید بارشوں کی پیش گوئی کے پیش نظر عوام کو احتیاطی تدابیر اختیار کرنے کا مشورہ دیا ہے۔