حلقہ این اے 213 عمرکوٹ میں ضمنی انتخاب کے لیے پولنگ شروع ہو گئی۔ صبح 8 بجے سے شام 5 بجے تک بغیر وقفے کےپولنگ کا عمل جاری رہے گا۔ پولنگ اسٹیشن کی سیکیورٹی کے لیے 4 ہزار پولیس اہلکار تعینات کیے گئے ہیں، وزارت داخلہ کی جانب سے حلقے میں رینجرز کی تعیناتی کا نوٹیفکیشن بھی جاری کیا گیا ہے۔این اے 213 کی نشست نواب یوسف تالپور کے انتقال کے باعث خالی ہوئی تھی۔حلقے میں پولنگ اسٹیشنوں کی تعداد 498 ہے، 98 خواتین پولنگ اسٹیشن بھی شامل ہیں، 269 کو حساس اور 91 کو انتہائی حساس پولنگ اسٹیشن قرار دیا گیا ہے۔ این اے213 کی نشست پر 18 امیدوار مد مقابل ہیں، پی پی کی صبا تالپور اور حزب اختلاف کے مشترکہ امیدوار لال مالھی میں مقابلہ ہے۔حلقے میں ووٹرز کی کل تعداد 6 لاکھ 8 ہزار 997 ہے، حلقے میں 2 لاکھ 87 ہزار 311 خواتین ووٹرز شامل ہیں۔