پاکستان کے دفتر خارجہ نے کہا ہے ڈھاکہ میں ہونے والے مشاورتی اجلاس میں دونوں ممالک نے باقاعدہ بات چیت کا سلسلہ جاری رکھنے اور زیرِ التوا معاہدوں کو جلد حتمی شکل دینے کی اہمیت پر زور دیا۔جمعے کو دفتر خارجہ کی طرف سے جاری بیان میں کہا گیا ہے کہ بنگلہ دیش اور پاکستان کے درمیان سیکریٹری خارجہ کی سطح پر مشاورت کا چھٹا دور ڈھاکہ میں 15 سال کے وقفے کے بعد ہوا، فریقین نے خوشگوار ماحول میں تعمیری اور مستقبل میں بات چیت جاری رکھنے کے عزم کا اظہار کیا۔ پاکستان کی جانب سے سیکریٹری خارجہ آمنہ بلوچ جبکہ بنگلہ دیش کے وفد کی قیادت سیکرٹری خارجہ ایم ڈی جاسم الدین نے کی۔بیان کے مطابق ’پاکستان اور بنگلہ دیش کے دوطرفہ تعلقات کے تمام شعبوں پر تبادلہ خیال کیا گیا جن میں سیاسی، اقتصادی اور تجارتی تعلقات، زراعت، ماحولیات اور تعلیم میں تعاون، ثقافتی تبادلے، دفاعی تعلقات اور عوام کے درمیان رابطے شامل ہیں۔‘پاکستان نے بنگلہ دیش کے طلبا کے لیے اپنی زرعی یونیورسٹیوں میں تعلیم کی پیشکش کی، جبکہ بنگلہ دیش نے فشریز میں ٹیکنیکل ٹریننگ اور میری ٹائمز سٹڈیز کی پیشکش کی ہے۔ بنگلہ دیش نے پاکستان کی نجی یونیورسٹیز کی طرف سے سکالرشپس کو سراہا اور تعلیم کے شعبے میں تعاون کو بڑھانے پر زور دیا۔دونوں اطراف نے کراچی اور چٹاگانگ کے درمیان شپنگ کے آغاز کا خیرمقدم کیا اور فضائی راستوں کو کھولنے کی اہمیت پر بھی زور دیا، ویزوں اور سفر کی سہولتوں پر بھی اطمینان کا اظہار کیا گیا۔بنگلہ دیش نے پاکستانی فنکاروں کی ڈھاکہ میں پرفارمنس کی تعریف کی، جبکہ پاکستان نے ثقافتی تبادلے کی حوصلہ افزائی کی۔وزرائے خارجہ نے اجلاس میں کھیل، میڈیا اور ثقافتی اداروں کے درمیان تعاون کے فروغ پر بھی تبادلہ خیال کیا۔سیکریٹری خارجہ نے انڈیا کے زیر انتظام کشمیر کی صورتحال پر بھی بریفننگ دی اور مسئلے کا حل کشمیریوں کی امنگوں اور اقوام متحدہ کی قراردادوں کے تحت کرنے پر پر زور دیا۔ڈاکٹر یونس نے پاکستان اور بنگلہ دیش کے دوطرفہ تعلقات کے بارے میں اپنے وژن کا بھی اظہار کیا (فوٹو: دفتر خارجہ)مشرق وسطیٰ کی صورتحال پر دونوں ممالک نے فلسطین اور خاص طور پر غزہ میں اسرائیلی جارحیت اور انسانی حقوق کی پامالی کی مذمت کی۔ دفتر خارجہ کے مطابق ’سیکریٹری خارجہ آمنہ بلوچ نے بعد ازاں مشیر برائے امور خارجہ ایم ڈی توحید حسین سے ملاقات کی۔ توحید حسین اور دیگر نے علاقائی مسائل بشمول سارک کی بحالی اور دونوں ممالک کے درمیان تجارتی و اقتصادی تعلقات پر تبادلہ خیال کیا۔‘’چیف ایڈوائزر پروفیسر محمد یونس سے سیکریٹری خارجہ کی ملاقات کے دوران تجارت اور سرمایہ کاری کے مواقع، نوجوانوں کے روابط اور سارک کی بحالی پر بات چیت مرکوز رہی۔ ڈاکٹر یونس نے پاکستان اور بنگلہ دیش کے دوطرفہ تعلقات کے بارے میں اپنے وژن کا بھی اظہار کیا۔‘دفتر خارجہ کے مطابق دونوں ممالک کے درمیان مشاورتی اجلاس کا ساتواں دور 2026 میں اسلام آباد میں ہو گا۔