"جب میں عمرے کی تیاری کر رہی تھی تو میری بہن مسلسل مجھ سے پوچھتی تھی کہ کیا آپ کو کوئی خاص کیفیت محسوس ہو رہی ہے؟ میں نے حیرت سے کہا کہ مجھے کچھ بھی محسوس نہیں ہو رہا۔ مگر جب ہم مکّہ مکرمہ پہنچے اور بہن نے کہا کہ آنکھیں بند کرلیں، تو جیسے ہی خانۂ کعبہ کو دیکھا، میری آنکھوں سے آنسو جاری ہوگئے۔ میرے دل میں وہی کیفیت بھر گئی جس کا ذکر میری بہن کر رہی تھیں۔ اس لمحے میں ساری دنیا کو بھول گئی تھی، جیسے میں خود کو اللہ کے قریب ترین پاتی ہوں۔" صبا فیصل نے ندا یاسر کے مارننگ شو میں اپنے پہلے عمرے کے تجربے کو دلکش انداز میں بیان کیا۔ ان کے لیے یہ سفر اور خانۂ کعبہ کی پہلی زیارت ایک ناقابلِ بیان روحانی تجربہ ثابت ہوئی۔ اداکارہ نے بتایا کہ مکّہ مکرمہ میں خانۂ کعبہ کی زیارت نے ان کے دل میں شدید جذبات پیدا کیے۔ ان کا کہنا تھا کہ یہ احساسات ہر انسان کو خود سے محسوس کرنے چاہئیں، کسی بھی بیان میں ان کا مکمل عکس ممکن نہیں۔ انہوں نے مزید کہا کہ ایسی سعادت کو صرف بیان نہیں بلکہ مکمل طور پر جیا جانا چاہیے۔