جی ٹی اے گیم کے فینز کو اس وقت شدید غم کو غصے کا شکار ہیں جب راک اسٹار کمپنی نے سب سے زیادہ متوقع گیم جی ٹی اے 6 کی ریلیز کو رواں سال کے بجائے اگلے سال تک موخر کردیا ہے۔ راک اسٹار گیمز نے گرینڈ تھیفٹ آٹو 6 کی ریلیز میں 26 مئی 2026 تک تاخیر کر دی ہے۔ گیم کو رواں سال موسم خزاں میں ریلیز کرنے کے لیے شیڈول کیا گیا تھا لیکن ایک حتمی تاریخ میسر نہ ہونے کیوجہ سے ریلیز کو اگلے سال تک لے جایا گیا۔اپنی ویب سائٹ پر ایک مختصر پوسٹ کے ذریعے فیصلے کا اعلان کرتے ہوئے کمپنی نے کہا: "ہمیں بہت افسوس ہے کہ آپ کی توقع سے زیادہ یہ تاخیر کا شکار ہوا ہے۔’ایک نئے گرینڈ تھیفٹ آٹو کے بارے میں آپ کی دلچسپی اور جوش ہماری پوری ٹیم کے لیے واقعی بڑی اہمیت کا حامل ہے۔ ہم آپ کے تعاون اور صبر کے لیے آپ کا شکریہ ادا کرنا چاہتے ہیں‘۔پوسٹ میں مزید کہا گیا کہ ہم نے جو بھی گیم جاری کیا ہے اس کے ساتھ، مقصد ہمیشہ آپ کی توقعات سے بڑھ کر کچھ کرنے کی کوشش کرنا ہے اور گرینڈ تھیفٹ آٹو 6 بھی اس عزم میں شامل ہے۔ ہم امید کرتے ہیں کہ آپ سمجھ گئے ہوں گے کہ ہمیں اس معیار پر ڈیلیور کرنے کے لیے اضافی وقت کی ضرورت ہے جس کے آپ مستحق ہیں۔