ٹیکنالوجی کی دنیا کی معروف کمپنی ایپل اپنے آئی فون متعارف کرانے کے روایتی سالانہ شیڈول میں تبدیلی پر غور کر رہی ہے۔ ایک تازہ رپورٹ کے مطابق، کمپنی 2026 سے آئی فونز کی لانچنگ کو دو مراحل میں تقسیم کرنے کا ارادہ رکھتی ہے۔ دی انفارمیشن کی رپورٹ میں بتایا گیا ہے کہ آئی فون 18 سیریز کے ماڈلز کو دو مختلف اوقات میں مارکیٹ میں لایا جائے گا۔ پہلے مرحلے میں پرو ماڈلز روایتی ستمبر میں متعارف ہوں گے، جب کہ معمولی قیمت والے ماڈلز کو اگلے سال 2027 کے موسم بہار میں پیش کیا جائے گا۔ اس ممکنہ حکمت عملی کا مقصد مارکیٹ کی متنوع ضروریات کو بہتر انداز میں پورا کرنا اور پروڈکشن و سپلائی چین کو مؤثر بنانا ہے۔مزید برآں، رپورٹ کے مطابق ایپل کا پہلا فولڈ ایبل آئی فون بھی 2026 میں پرو ماڈلز کے ساتھ متعارف کرائے جانے کا امکان ہے، جو کمپنی کے لیے ایک نیا سنگ میل ثابت ہو سکتا ہے۔اسی دوران، ایپل کی جانب سے 2024 میں آئی فون 17 ایئر — جو کہ اب تک کا سب سے پتلا آئی فون ہو گا — بھی مارکیٹ میں لانے کی تیاری جاری ہے، اور 2026 میں اس ماڈل کی نئی ورژن کو دوبارہ متعارف کرانے کی بھی منصوبہ بندی کی جا رہی ہے۔دلچسپ بات یہ ہے کہ کم لاگت والے آئی فون 18 ماڈلز کی پیداوار بھارت میں کرنے پر بھی سنجیدگی سے غور کیا جا رہا ہے، تاکہ چین پر انحصار کم ہو سکے، خاص طور پر امریکی ٹیرف پالیسیوں کے ممکنہ اثرات کے پیش نظر۔ٹیگز: