پاکستان کرکٹ بورڈ (پی سی بی) نے کہا ہے کہ پاکستان سپر لیگ (پی ایس ایل) کا دسواں ایڈیشن شیڈول کے مطابق جاری رہے گا۔بدھ کے روز پی سی بی نے اپنی ویب سائٹ پر وضاحت کی کہ پی ایس ایل کے میچز شیڈول کے مطابق منعقد ہوں گے اور آج راولپنڈی میں اسلام آباد یونائیٹڈ اور کوئٹہ گلیڈی ایٹرز کا میچ ہوگا۔ میچ کا ٹاس شام 7 بج کر 30 منٹ پر اور میچ کا باقاعدہ آغاز 8 بجے ہوگا۔ پی ایس ایل کے اگلے چار میچز 7 سے 10 مئی تک راولپنڈی میں شیڈول ہیں، جبکہ فائنل گروپ میچ 11 مئی کو ملتان میں کھیلا جائے گا۔ ٹورنامنٹ کا کوارٹر فائنل 13 مئی کو راولپنڈی میں ہوگا، دو ایلیمنیٹر میچز 14 اور 16 مئی کو لاہور کے قذافی سٹیڈیم میں ہوں گے جبکہ فائنل بھی لاہور میں ہی شیڈول ہے۔ پاکستان اور انڈیا کے درمیان بڑھتی ہوئی کشیدگی کے بعد افواہیں گردش کر رہی تھیں کہ پی ایس ایل میچز بھی متاثر ہو سکتے ہیں جس کی تردید پی سی بی نے اپنے بیان کے ذریعے کر دی ہے۔