پاکستان میں ایئرسپیس وقتاً فوقتاً بند ہونے کے باعث حج پروازیں بھی متاثر ہوئی ہیں۔ترجمان وزارت مذہبی امور نے جمعے کو جاری بیان میں کہا ہے کہ فلائٹ آپریشن وقتاً فوقتاً بند ہونے کے باعث متعدد حج پروازیں منسوخ ہوئی ہیں یا پھر تعطل کا شکار ہیں۔ترجمان کے مطابق 7 سے 9 مئی کے دوران 13 حج پروازوں کا شیڈول متاثر ہوا ہے، 4 حج پروازیں منسوخ اور 9 پروازیں تاخیر کا شکار ہوئی ہیں۔انہوں نے بتایا کہ اسلام آباد اور لاہور سے سعودی ائیرلائن کی دو، دو حج پروازیں منسوخ ہوئی ہیں۔جبکہ لاہور سے تین، اسلام آباد اور کوئٹہ سے دو، دو جبکہ ملتان اور کراچی سے ایک ایک حج پرواز تاخیر کا شکار ہوئی ہے۔ترجمان نے بتایا کہ فلائٹ آپریشن کی عارضی بندش کے باعث 3 ہزار 80 عازمین حج کا شیڈول متاثر ہوا ہے، بیشتر پروازیں چند گھنٹوں کے التوا کے بعد عازمین کو لے کر روانہ ہوئیں۔پروازوں کی منسوخی کے باعث رہ جانے والے 345 عازمین حج کو اسلام آباد سے پی آئی اے کی خصوصی پرواز سے آج روانہ کیا گیا ہے۔ مزید 540 عازمین کو اسلام آباد اور لاہور سے خصوصی پروازوں کے ذریعے روانہ کیا جائے گا۔وزارت مذہبی امور نے حج پروازوں کے شیڈول سے متعلق معلومات کی فوری اور مؤثر فراہمی کے لیے ہیلپ لائن بھی قائم کر دی ہے جہاں سے حج پروازوں کے اوقات اور روانگی سے متعلق تازہ ترین معلومات حاصل کی جا سکتی ہیں۔وزارت مذہبی امور نے عازمین کو ہدایت کی ہے کہ وہ پروازوں سے متعلق معلومات کے لیے متعلقہ حاجی کیمپوں سے بھی رابطے میں رہیں۔