حکومت نے آئندہ دو ہفتوں کے لیے پیٹرولیم مصنوعات کی نئی قیمتوں کا اعلان کر دیا ہے۔حکومت نے پیٹرول کی قیمتیں برقرار رکھیں ہیں جبکہ ڈیزل اور مٹی کا تیل سستا کیا گیا ہے۔وزارت خزانہ کی جانب سے جمعے کو جاری اعلامیے کے مطابق پیٹرول کی قیمت 252 روپے 63 پیسے فی لیٹر برقرار ہے جبکہ دو روپے کی کمی کے بعد ڈیزل کی قیمت 254 روپے 64 پیسے فی لیٹر ہو گئی ہے۔اس کے علاوہ مٹی کا تیل 5 روپے 4 پیسے فی لیٹر سستا کیا گیا ہے جس کے بعد نئی قیمت 164روپے 65 پیسے فی لیٹر ہے۔لائٹ ڈیزل آئل کی قیمت میں بھی 4 روپے 68 پیسے فی لیٹر کی کمی کے بعد نئی قیمت 150 روپے 65 پیسے مقرر کی گئی ہے۔اعلامیے میں کہا گیا ہے کہ نئی قیمتوں کا اطلاق آج 16 مئی سے ہو گا۔عام طور پر حکومت کی جانب سے نئی قیمتوں کا اعلان رات بارہ بجے سے پہلے کیا جاتا ہے لیکن اس مرتبہ جمعرات اور جمعے کی درمیانی شب اعلامیہ جاری کیا گیا۔