انڈین حملوں کے جواب میں افواجِ پاکستان کی تاریخی فتح پر خراج تحسین پیش کرنے کے لیے ملک بھر میں آج یومِ تشکر منایا جا رہا ہے۔یوم تشکر کے موقع پر وفاقی درالحکومت اسلام آباد میں 31 جبکہ صوبائی دارلحکومت میں21 توپوں کی سلامی دی گئی۔یومِ تشکر کی مرکزی تقریب اسلام آباد میں منعقد ہو گی۔وزیراعظم محمد شہبازشریف تقریب کے مہمان خصوصی ہوں گے جبکہ چیئرمین جوائنٹ چیفس آف سٹاف کمیٹی اور چیف آف آرمی سٹاف بھی تقریب میں شریک ہوں گے۔ریڈیو پاکستان کے مطابق آج کے دن کراچی میں مزار قائد اور لاہور میں قومی شاعر ڈاکٹر علامہ محمد اقبال کے مزار پر گارڈز کی تبدیلی کی تقریبات ہوں گی۔انڈین حملوں کے جواب میں لانچ کیے گئے آپریشن بُنیان مرصوص میں اپنی جان دینے والوں کو خراج عقیدت پیش کیا جائے گا اور لواحقین سے خصوصی ملاقاتیں کی جائیں گی۔یوم تشکر کے موقع پر اپنے علیحدہ علیحدہ پیغامات میں صدر آصف علی زرداری اور وزیراعظم محمد شہبازشریف نے کہا کہ یہ دن انڈیا کی کھلی جارحیت کے خلاف پاکستان کی فتح پر شکر ادا کرنے کے لیے منایا جا رہا ہے۔پیغام میں صدر آصف علی زرداری نے کہا کہ پاکستان اپنی خودمختاری، علاقائی سالمیت اور بنیادی قومی مفادات پر کبھی سمجھوتہ نہیں کرے گا۔انہوں نے کہا کہ انڈیا کی بلااشتعال جارحیت کے جواب میں آپریشن بنیان مرصوص کی فتح کا دن منانے کا یہ اہم موقع ہے۔وزیراعظم شہبازشریف نے اپنے پیغام میں کہا کہ ’ہماری بہادر اور پیشہ وارانہ طور پر ماہر مسلح افواج نے مؤثر انداز میں دشمن کی زبان میں اس کو جواب دیا اور عسکری تاریخ کا ایک سنہری باب رقم کیا۔‘وزیراعظم نے کہا کہ ہمارے شاہینوں نے دشمن کو دندان شکن جواب دیا۔انہوں نے کہا کہ یہ کامیابی نہ صرف ہماری مسلح افواج کی ہے بلکہ ایک عزت دار اور باوقار قوم کی حیثیت سے ہمارے اصولوں کی بھی ہے۔