"جان ہے تو جہان ہے، اس لیے روزانہ ورزش کرتا ہوں۔" وسیم اکرم نے فٹنس کے راز سے پردہ اٹھاتے ہوئے کہا کہ اُن کا مقصد صرف خود کو چاق و چوبند رکھنا نہیں، بلکہ نئی نسل کو بھی صحت مند طرزِ زندگی کی طرف راغب کرنا ہے۔ انہوں نے مزید کہا، "مجھے ویوز یا ریویوز کی پرواہ نہیں، میں خود کے لیے جیتا ہوں۔ جانوروں کی طرح نہیں کھاتا، انسان ہوں تو کھانے میں بھی تمیز رکھتا ہوں۔"
ایک مقامی ہوٹل میں تقریب کے دوران گفتگو کرتے ہوئے، سوئنگ کے بادشاہ نے اپنے کھانے پینے کے انداز سے لے کر فلمی دنیا کے تجربے تک سب کچھ کھل کر بیان کیا۔ اُن کا کہنا تھا، "کبھی سنا ہے کوئی کم کھانے سے مر گیا ہو؟ اصل مسئلہ یہ ہے کہ لوگ 25 نان کھا کر سونا چاہتے ہیں اور صبح زندہ اٹھنے کی امید بھی رکھتے ہیں!" انہوں نے بتایا کہ وہ روزمرہ کھانوں میں اسپغول کا استعمال کرتے ہیں تاکہ نظام ہاضمہ درست رہے اور دن بھر توانائی برقرار رہے۔
وسیم اکرم نے فلمی تجربات پر بات کرتے ہوئے ہنستے ہوئے کہا، "مجھے کیا پتا تھا کہ ایک فلمی سین کے لیے ایک ایک لائن رٹنی پڑے گی۔ دور سے سب کچھ آسان لگتا ہے، لیکن حقیقت میں اداکاری بہت مشکل کام ہے۔" ان کا کہنا تھا کہ فلم کی شوٹنگ کے دوران فواد خان سمیت سبھی فنکاروں سے دلچسپ بات چیت ہوتی رہی، اور سیٹ پر وقت خوبصورت لمحات میں گزرا۔