مصر اور مشرق وسطی میں کامیاب فن ٹیک ایم این ٹی ہالان نے اسٹیٹ بینک آف پاکستان سے مائیکرو فنانس بینکاری کا لائسنس حاصل کر لیا ہے۔ اب ہالان مائیکرو فنانس بینک سندھ سے باہر پورے ملک میں اپنی خدمات فراہم کر سکے گا۔
قومی سطح کے لائسنس کے بعد ہالان مائیکرو فنانس بینک برانچ لیس بینکنگ، ادائیگی کے کارڈز، موبائل بینکنگ، ریٹیلرز لین دین اور والیٹ سروسز وغیرہ متعارف کراسکتا ہے۔ یہ نئی خدمات بینک کی موجودہ پروڈکٹس جیسے کہ مائیکروفنانس قرض، تنخواہ کی پیشگی ادائیگی، پنشنز، کرنٹ اور سیونگز اکاؤنٹس کو مؤثر انداز میں مکمل کریں گی۔
بینک کا مقصد مالیاتی طور پر محروم طبقات کو سہولتیں فراہم کرنا ہے، جن کو بغیر ضمانت کے کم مالیت کے قرض فراہم کیے جائیں گے۔ ان قرضوں کے لیے کم سے کم دستاویزات درکارہوں گی، پراسیسنگ کا عمل تیز ہوگااور مناسب و مسابقتی ماہانہ اقساط کی سہولت دی جائے گی۔بینک خاص طور پر خواتین، زرعی کارکنوں اور کمرشل گاڑیوں کے لیے مالی معاونت فراہم کرے گا۔ یہ جامع ماڈل مائیکرو انٹرپرینیورز، چھوٹے تاجروں اور کم آمدن طبقات کو بغیر ضمانت خودمختاری حاصل کرنے کے قابل بنائے گا۔
ایم این ٹی ہالان کے بانی اور چیف ایگزیکٹو آفیسر منیر نخلہ نے کہا، ”قومی سطح کے لائسنس کا حصول ہمارے سفر میں ایک اہم سنگ میل ہے، جس کا مقصد پاکستان بھر میں زیادہ سے زیادہ افراد اور کاروباروں کو خدمات فراہم کرنا ہے۔ یہ کامیابی اسٹیٹ بینک آف پاکستان کی معاونت کے بغیر ممکن نہ تھی۔ پاکستان میں سرمایہ کاری کے آغاز کے بعد سے ہمیں سرکاری و غیر سرکاری شراکت داروں کی جانب سے غیر معمولی تعاون حاصل ہوا ہے۔ پاکستان میں ہماری کامیابی اس بات کا ثبوت ہے کہ ایم این ٹی۔ ہالان کس طرح جدید ٹیکنالوجی اور فنی مہارت کو بروئے کار لا کر تیزی سے نئی مارکیٹوں تک رسائی حاصل کررہا ہے۔“
ہالان مائیکرو فنانس بینک کے چیف ایگزیکٹو آفیسر کرسٹوس آرگیریو نے کہا، ”ہمارے جدید کسٹمر سینٹرک ماڈل نے تیزی سے ترقی کی ہے، جس کے نتیجے میں صرف 12 ماہ میں ہمارے کاروباری مقامات کی تعداد 19 سے بڑھ کر 49 ہوگئی ہے۔ قومی لائسنس کے حصول سے ہمیں آئندہ تین برسوں میں یہ تعداد 300 تک لے جانے کا موقع ملا ہے، تاکہ ہم پاکستان کی مالیاتی طور پر محروم کمیونیٹیز کی ضروریات کو موثر انداز میں پورا کر سکیں۔“
مالیاتی خودمختاری ایم این ٹی ہالان کے عالمی مشن کا حصہ ہے، جس کا مقصد ٹیکنالوجی کے ذریعے مالیاتی خدمات تک رسائی کو جدید اور موثر بنانا ہے۔ ایم این ٹی۔ہالان نے 2024 میں ایڈوانس مائیکرو فنانس بینک خریدا، جو ادارے کی عالمی توسیع کا حصہ ہے۔ اس توسیع میں مصر کے علاوہ ترکی اور متحدہ عرب امارات جیسی اہم مارکیٹیں شامل ہیں۔ ان تمام مارکیٹوں کے لیے ایم این ٹی۔ ہالان نے اب تک 13 ارب امریکی ڈالرز سے زائد کی رقوم جاری کی ہیں اور 80 لاکھ سے زائد صارفین کو خدمات فراہم کی ہیں۔