وزیراعظم پاکستان شہباز شریف اور امریکی وزیر خارجہ مارکو روبیو کے درمیان ٹیلی فونک رابطہ ہوا ہے۔وزیراعظم آفس کے مطابق ’امریکی وزیر خارجہ نے جمعرات کی شام شہباز شریف کو ٹیلی فون کیا اور مشرق وسطیٰ کی صورتِ حال پر بات چیت کی۔‘ ’مارکو روبیو کے ساتھ گفتگو کے دوران وزیراعظم نے صدر ڈونلڈ ٹرمپ کی باہمت اور فیصلہ کن قیادت کو سراہا جس کی وجہ سے ایران اور اسرائیل کے درمیان جنگ بندی ممکن ہوئی۔‘اس موقعے پر وزیراعظم نے پاکستان اور انڈیا کے درمیان جنگ بندی میں امریکہ کے کلیدی کردار پر وزیر خارجہ مارکو روبیو کا شکریہ ادا کیا۔ وزیراعظم اور امریکی وزیر خارجہ نے پاکستان اور امریکہ کے تعلقات کو مضبوط بنانے خصوصاً تجارت میں اضافے کے لیے مل کر کام جاری رکھنے پر اتفاق کیا۔ امریکی وزیر خارجہ سے بات کرتے ہوئے وزیراعظم شہباز شریف نے کہا کہ ’پاکستان مشرق وسطیٰ میں قیام امن کے لیے اپنا تعمیری کردار ادا کرتا رہے گا۔‘پاکستان کی کوششوں کو سراہتے ہوئے وزیر خارجہ مارکو روبیو کا کہنا تھا کہ ’امریکہ خطے میں امن اور استحکام کو فروغ دینے کے لیے پاکستان کے ساتھ مل کر کام کرنا چاہتا ہے۔‘