بہاولپور کے علاقے چنی گوٹھ میں معمولی سی رقم کی شرط نے ایک بزرگ کی جان لے لی۔ 66 سالہ شخص نہر عبور کرنے کی کوشش میں ڈوب گیا، جب کہ مقابلہ کرنے والا دوسرا بزرگ راستے سے ہی پلٹ آیا۔ ریسکیو ذرائع کے مطابق واقعہ عباسیہ کینال میں پیش آیا، جہاں دو بزرگوں کے درمیان تیراکی کا مقابلہ طے پایا۔ شرط یہ تھی کہ جو شخص کامیابی سے نہر پار کرے گا، اسے ایک ہزار روپے ملیں گے۔ لیکن یہ غیر ذمہ دارانہ مقابلہ ایک انسانی جان نگل گیا۔ ڈوب کر جاں بحق ہونے والے شخص کی لاش نکال لی گئی، جبکہ دوسرا فرد نہر کے درمیان سے واپس آ گیا۔ جاں بحق شخص کے بھتیجے نے الزام عائد کیا ہے کہ محلے کے کچھ افراد نے جان بوجھ کر اسے اس خطرناک کوشش پر اکسایا اور جب وہ پانی میں مدد کے لیے پکار رہا تھا، تو کوئی آگے نہ بڑھا۔ لوگ صرف تماشائی بنے رہے۔ پولیس کا کہنا ہے کہ متاثرہ شخص کی اہلیہ کی مدعیت میں مقدمہ درج کر لیا گیا ہے اور واقعے کی تفتیش جاری ہے۔ یہ واقعہ صرف ایک المناک حادثہ نہیں، بلکہ ہمارے معاشرتی رویوں پر بھی سوالیہ نشان ہے۔ زندگی کو کھیل بنانے اور سنجیدگی سے نہ لینے کا یہ انداز اکثر قیمت لے کر جاتا ہے اور اس بار قیمت ایک بزرگ کی جان بنی۔