ایران میں ایک خاتون کی جانب سے 22 سال میں اپنے 11 شوہروں کو زہر دے کر قتل کرنے کی سنسنی خیز خبر سامنے آئی ہے۔
ایرانی ویب سائٹ کے مطابق رواں ہفتے ایران کے سب سے بڑے سیریل قتل کیس کی سماعت ہوئی، کلثوم اکبری نامی ملزمہ کو 11 شوہروں کو ان کی جائیداد اور پیسہ ہتھیانے کے لیے قتل کرنے کے الزام میں عدالت میں پیش کیا گیا۔
استغاثہ نے عدالت کو بتایا کہ کلثوم اکبری پر 2000 سے 2022 کے دوران ذیابیطس سمیت دیگر دوائیوں اور منشیات میں اپنے شوہروں کو زہر دینے کا الزام ہے۔
رپورٹ کے مطابق کلثوم اکبری کے خلاف 2023 میں ان کے شوہر عزیز اللہ بابائی کی موت کے بعد مقدمہ درج کیا گیا تھا جس میں پہلے عزیزاللہ کے بیٹے کو مشکوک ٹھہرایا گیا تھا۔
عزیز اللہ کے خاندانی دوست نے انکشاف کیا کہ کلثوم نے عزیزاللہ کو قتل کرنے کی کوشش کی، بیٹے سے تفتیش کے دوران کلثوم کی گرفتاری سامنے آئی جس کے بعد دوران تفتیش کلثوم نے 11 شوہروں کو قتل کرنے کا اعتراف کیا۔
خاتون نے کہا کہ وہ بوڑھے مردوں سے شادی کرنے کے بعد انھیں آہستہ آہستہ منشیات کے ذریعے زہر دے کر قتل کردیتی تھی۔
استغاثہ کے مطابق چونکہ کلثوم کے شوہر بوڑھے اور بیمار تھے لہٰذا ان کی موت کو طبعی قرار دے کر نظر انداز کیا گیا، یہی وجہ تھی کہ کلثوم کی سیریل کلنگ کا سلسلہ 2 دہائیوں سے بھی زائد عرصہ جاری رہا۔
دوران سماعت متاثرین کے اہل خانہ نے عدالت سے کلثوم اکبری کو پھانسی دینے کا مطالبہ کیا تاہم عدالت کی جانب سے ملزمہ کی ذہنی حالت اور مکمل سماعت تک فیصلہ محفوظ رکھا گیا ہے۔