اسپین کے شہر بارسلونا میں چیئرمین سینیٹ یوسف رضا گیلانی کے بیٹے اور رکن قومی اسمبلی عبدالقادر گیلانی ایک ناخوشگوار واقعے کا شکار ہو گئے۔ اطلاعات کے مطابق وہ سیاحت کے دوران قیمتی گھڑی سے محروم ہو گئے، جو چور اچانک چھین کر فرار ہو گیا۔ ذرائع کا کہنا ہے کہ یہ گھڑی گولڈ پلیٹڈ تھی اور اس کی مالیت تقریباً چھپن ہزار یورو، یعنی ایک کروڑ چوراسی لاکھ پاکستانی روپے بنتی ہے۔ واقعہ اس وقت پیش آیا جب عبدالقادر گیلانی شہر میں گھوم پھر رہے تھے۔ مقامی پولیس کو اس چوری کی اطلاع دے دی گئی ہے، تاہم ابھی تک ملزم کا سراغ نہیں مل سکا۔ بارسلونا میں سیاحوں کو نشانہ بنانے کے ایسے واقعات پہلے بھی رپورٹ ہو چکے ہیں، جس کے باعث ماہرین سیاحوں کو قیمتی اشیاء کے ساتھ محتاط رہنے کا مشورہ دیتے ہیں۔