کوئٹہ میں سریاب کے علاقے لنک بادینی روڈ پر منگل کے روز دھماکا ہوا، جس کے نتیجے میں ایک شخص زخمی ہوگیا۔
پولیس کے مطابق دھماکا اُس وقت ہوا جب ایک پولیس گاڑی جائے وقوعہ سے گزر چکی تھی۔ پولیس حکام کا کہنا ہے کہ دھماکے سے قریبی گزرنے والی ایک عام شہری کی گاڑی کو بھی نقصان پہنچا۔ زخمی شخص کو فوری طور پر قریبی اسپتال منتقل کردیا گیا ہے۔
واقعے کی اطلاع ملتے ہی سکیورٹی فورسز نے علاقے کو گھیرے میں لے کر شواہد اکٹھے کرنا شروع کر دیے۔ دھماکے کی نوعیت جاننے کے لیے بم ڈسپوزل اسکواڈ (بی ڈی ایس) کی ٹیم طلب کرلی گئی ہے۔
پولیس کا کہنا ہے کہ مزید تحقیقات جاری ہیں اور واقعے کے پس منظر میں تمام پہلوؤں کا جائزہ لیا جا رہا ہے۔