پنجاب میں دریاؤں کے پانی کے بہاؤ میں مسلسل اضافہ ہو رہا ہے جس کے باعث قریبی نشیبی علاقوں میں سیلابی صورتحال پیدا ہونے کا خدشہ ہے۔ ترجمان صوبائی ڈیزاسٹر مینجمنٹ اتھارٹی (پی ڈی ایم اے) پنجاب کے مطابق تربیلا، کالا باغ، چشمہ اور تونسہ کے مقامات پر درمیانے درجے کا سیلاب ریکارڈ کیا گیا ہے۔ تربیلا کے مقام پر پانی کا بہاؤ 3 لاکھ 30 ہزار کیوسک، کالاباغ پر 4 لاکھ 32 ہزار کیوسک، چشمہ پر 4 لاکھ 80 ہزار کیوسک جبکہ تونسہ کے مقام پر 4 لاکھ 54 ہزار کیوسک ریکارڈ کیا گیا۔ ترجمان نے مزید بتایا کہ دریائے ستلج میں گنڈا سنگھ والا اور سلیمانکی کے مقام پر نچلے درجے کا سیلاب ہے جہاں پانی کا بہاؤ بالترتیب 65 ہزار اور 69 ہزار کیوسک ہے۔ دریائے راوی میں جسڑ کے مقام پر بھی نچلے درجے کا سیلاب موجود ہے اور پانی کا بہاؤ 54 ہزار کیوسک ہے۔ اسی طرح نالہ پلکھو میں درمیانے درجے جبکہ نالہ ایک بئیں اور بسنتر میں نچلے درجے کا سیلاب ریکارڈ ہوا ہے۔ حکام کے مطابق بالائی علاقوں میں مسلسل بارشوں کے باعث پانی کی سطح میں مزید اضافہ متوقع ہے۔ پی ڈی ایم اے نے دریاؤں کے کنارے میں رہنے والے شہریوں کو فوری طور پر محفوظ مقامات پر منتقل ہونے کی ہدایت جاری کی ہے۔ حکام کے مطابق سیلاب سے متاثرہ علاقوں میں فلڈ ریلیف کیمپس قائم کر دیے گئے ہیں تاکہ متاثرین کو بروقت امداد فراہم کی جا سکے۔