پاکستان تحریک انصاف کی سیاسی کمیٹی نے فیصلہ کیا ہے کہ حلقہ این اے 129لاہور کے ضمنی انتخاب میں حصہ لیا جائے گا۔ یہ فیصلہ گزشتہ رات اسلام آباد میں زوم پر ہونے والے اجلاس میں کیا گیا جس کا اعلامیہ جاری کر دیا گیا ہے۔ اعلامیے کے مطابق سیاسی کمیٹی نے بانی پی ٹی آئی کا شکریہ ادا کیا کہ انہوں نے سیاسی معاملات پر مکمل اعتماد کمیٹی کے سپرد کیا ہے۔ اجلاس میں بتایا گیا کہ میاں اظہر کی وفات کے بعد خالی ہونے والی نشست پر امیدوار کھڑا کیا جائے گا۔ اعلامیے میں توشہ خانہ ٹرائل کی اڈیالہ جیل میں روزانہ سماعت پر بھی تشویش کا اظہار کیا گیا اور مؤقف اختیار کیا گیا کہ روزانہ سماعت سے ملزمان کے بنیادی حقوق متاثر ہوں گے اور انصاف کی فراہمی میں بھی رکاوٹ پیدا ہوگی۔ اعلامیے میں کہا گیا کہ 9 مئی کے مقدمات میں نااہلی پانے والے ارکان پارٹی کے حقیقی نمائندہ ہیں اور ان کو خراج تحسین پیش کیاگیا۔ اعلامیے میں مزید کہا گیا کہ نااہل ارکان کے حلقوں میں ہونے والے ضمنی انتخابات کا بائیکاٹ کیا جائے گا۔ اعلامیے میں بتایا گیا ہے کہ بانی پی ٹی آئی کی ہدایت پر قومی اسمبلی کی پبلک اکاؤنٹس کمیٹی سے استعفیٰ دینے کا فیصلہ کیا گیا جبکہ ارکان کو قائمہ کمیٹیوں کی چیئرمین شپ اور رکنیت سے بھی فوری طور پر مستعفی ہونے کی ہدایت دے دی گئی ہے۔ واضح رہے کہ گزشتہ روز عمران خان سے اڈیالہ جیل میں ملاقات کے بعد میڈیا سے گفتگو کرتے ہوئے عظمیٰ خان نے کہا تھا کہ بانی پی ٹی آئی نے ضمنی الیکشن میں حصہ نہ لینے کی ہدایت کی اور کہا تھا کہ الیکشن میں جانے سے پارٹی کو نقصان ہوگا لیکن سیاسی کمیٹی نے اب فیصلہ کیا ہے کہ این اے 129 میں امیدوار کھڑا کیا جائے گا۔