امریکا کے وسطی علاقے کوسٹا ریکا کے ساحل پر ایک نایاب نارنجی رنگ کی شارک مچھلی دیکھی گئی ہے جس نے ماہرینِ حیاتیات کو حیران کر دیا۔ ماہی گیر گارون واٹسن تورٹوگیرو نیشنل پارک کے قریب شکار کے لیے کشتی پر موجود تھے اس وقت اچانک اس کی نظر اپنی کشتی کے قریب ایک غیر معمولی شارک پر پڑی۔ ماہی گیر کے مطابق یہ شارک تقریباً 6 فٹ 6 انچ لمبی تھی جس کا جسم نارنجی رنگ کا اور آنکھیں سفید تھیں جس کی وجہ سے وہ بظاہر خوفناک دکھائی دے رہی تھی۔ ماہرین کے مطابق اس شارک کی منفرد رنگت کی وجہ ایک جینیاتی حالت ہے جسے زینتھ ازم کہا جاتا ہے۔ اس کیفیت میں جلد میں موجود گہرے روغن کی کمی کی وجہ سے پیلا یا نارنجی رنگ زیادہ نمایاں ہو جاتا ہے۔ سائنسدانوں کا کہنا ہے کہ یہ شارک اس لیے بھی منفرد ہے کیونکہ اس کی آنکھیں بھی سفید ہیں جس کا مطلب یہ ہو سکتا ہے کہ اس میں البینیزم بھی موجود ہے جس کی وجہ سے میلانین نامی روغن کی بہت کم یا کوئی پیداوار نہیں ہوتی اور مخلوق کی جلد، بالوں اور آنکھوں کا رنگ سفید ہو سکتا ہے۔ اس نایاب شارک کی تصاویر اور تفصیلات کو سمندری حیاتیات کے ایک جریدے میں شائع کیا گیا ہے۔