پاکستان پیپلز پارٹی کے سینئر رہنما اور سابق اسپیکر سندھ اسمبلی آغا سراج درانی طویل علالت کے بعد کراچی کے نجی اسپتال میں انتقال کرگئے۔ آغا سراج درانی کی میت کراچی سے ان کے آبائی شہر شکارپور روانہ کردی گئی۔ وزیراعلیٰ سندھ سید مراد علی شاہ اور پیپلز پارٹی سندھ کے صدر نثار کھوڑو، وزیراعلیٰ سندھ کے خصوصی طیارے کے ذریعے مرحوم کی میت کے ہمراہ شکارپور روانہ ہوئے۔ آغا سراج درانی کو آج بعد نمازِ عشاء ان کے آبائی علاقے گھڑی یاسین کوٹ درانی میں سپردِ خاک کیا جائے گا،جہاں تدفین کے انتظامات مکمل کرلیے گئے ہیں۔ اہلِ خانہ کے مطابق آغا سراج درانی کو عارضۂ قلب لاحق تھا اور طبیعت بگڑنے پر ایک ماہ قبل انہیں کراچی منتقل کیا گیا تھا جہاں وہ مسلسل زیرِ علاج رہے۔ آغا سراج درانی 31 مئی 2013 سے 25 مئی 2024 تک اسپیکر سندھ اسمبلی کے عہدے پر فائز رہے جبکہ وہ مارچ 2022 سے اکتوبر 2022 تک قائم مقام گورنر سندھ کے طور پر بھی خدمات انجام دیتے رہے۔ ان کا شمار پاکستان پیپلز پارٹی کے تجربہ کار اور بااثر رہنماؤں میں ہوتا تھا۔ ان کے انتقال پر سیاسی و سماجی حلقوں کی جانب سے گہرے رنج و غم کا اظہار کیا گیا ہے۔ صدر مملکت اور وزیراعظم نے آغا سراج درانی کے انتقال پر افسوس کا اظہار کرتے ہوئے ان کی سیاسی و جمہوری خدمات کو خراجِ عقیدت پیش کیا۔ President Asif Ali Zardari has expressed deep sorrow over the passing of former Speaker of the Sindh Assembly, Agha Siraj Durrani. The President paid tribute to his political and public services, noting his role in strengthening democracy and serving the people of Sindh.— The President of Pakistan (@PresOfPakistan) October 15, 2025 ایوانِ صدر سے جاری بیان میں کہا گیا کہ آغا سراج درانی نے ہمیشہ جمہوریت کے استحکام اور پارلیمان کے وقار کے لیے کردار ادا کیا۔ اس موقع پر پیپلز پارٹی کے مختلف وفود نے آغا سراج درانی کے اہل خانہ سے ملاقات کی اور تعزیت، رنج و غم کا اظہار کیا۔