دنیا کے دیگر ممالک کی طرح پاکستان میں بھی ہندو برادری آج روشنیوں کا تہوار دیوالی مذہبی عقیدت اور روایتی جوش و جذبے کے ساتھ منا رہی ہے۔ ملک بھر کے مندروں میں خصوصی عبادات، دعائیہ تقریبات، اور چراغاں کا اہتمام کیا گیا ہے جبکہ ہندو برادری کے افراد اپنے گھروں اور مندروں کو مٹی کے دیوں سے روشن کر رہے ہیں۔ دیوالی کو روشنی کے اندھیرے پر اور نیکی کے بدی پر غلبے کی علامت سمجھا جاتا ہے۔ ہندو روایت کے مطابق یہ تہوار اس دن کی یاد میں منایا جاتا ہے جب رام 14 سالہ جلاوطنی کے بعد راون کو شکست دے کر ایودھیا واپس لوٹے تھے۔ ان کی واپسی پر لوگوں نے مٹی کے دیوں سے گھروں کو روشن کیا جو آج تک ایک روایت کے طور پر جاری ہے۔برصغیر کے مختلف علاقوں میں اسے دولت اور خوشحالی کی دیوی لکشمی کے اعزاز میں بھی منایا جاتا ہے۔ اس سال دیوالی کا خصوصی موضوع روشنی اندھیرے پر، ہم آہنگی کے ذریعے اتحاد رکھا گیا ہے جس کا مقصد امن، رواداری اور بین المذاہب ہم آہنگی کے پیغام کو اجاگر کرنا ہے۔ وزیراعظم محمد شہباز شریف نے دیوالی کے موقع پر پاکستان اور دنیا بھر میں بسنے والی ہندو برادری کو دلی مبارکباد پیش کی ہے۔ اپنے پیغام میں انہوں نے کہا کہ دیوالی روشنی کی تاریکی پر اور امید کی مایوسی پر فتح کی علامت ہے۔ یہ تہوار مثبت سوچ، بھائی چارے اور اتحاد کے جذبے کو فروغ دیتا ہے۔ انہوں نے کہا کہ پاکستان ایک ایسا معاشرہ ہے جو تنوع پر فخر کرتا ہے اور یہی تنوع قومی وحدت کو مضبوط بناتا ہے۔ وزیراعظم نے پاکستان میں ہندو برادری کی سماجی، اقتصادی اور سیاسی خدمات کو سراہتے ہوئے کہا کہ مختلف عقائد کا یہ تنوع ہمارے درمیان اتحاد کا حقیقی ذریعہ ہے۔ صدرِ مملکت آصف علی زرداری نے بھی دیوالی کے موقع پر پاکستان اور بیرونِ ملک مقیم ہندو برادری کو مبارکباد دیتے ہوئے کہا کہ آئینِ پاکستان تمام شہریوں کو مساوی حقوق اور مذہبی آزادی کی ضمانت دیتا ہے۔صدر مملکت نے کہا کہ ہندو برادری پاکستان کے سماجی، ثقافتی اور معاشی ڈھانچے کا ایک اہم حصہ ہے اور تعلیم، تجارت و عوامی خدمت کے شعبوں میں ان کی خدمات قابلِ تحسین ہیں۔ انہوں نے مزید کہا کہ دیوالی ہمیں رواداری، اتحاد اور پُرامن بقائے باہمی کے عزم کو تازہ کرنے کی ترغیب دیتی ہے اور دعا کی کہ یہ تہوار تمام کے لیے خوشی، امن اور خوشحالی کا باعث بنے۔ ملک بھر میں دیوالی کی تقریبات کے موقع پر سیکیورٹی انتظامات سخت کر دیے گئے ہیں جبکہ مختلف شہروں میں مندر، کمیونٹی سینٹرز اور ہالز میں خصوصی تقاریب، ثقافتی پروگرامز اور خیر سگالی تقاریر کا اہتمام کیا جا رہا ہے۔ دیوالی کے موقع پر حکومتِ پاکستان اور عوام نے ہندو برادری کے لیے نیک خواہشات کا اظہار کیا ہے اور روشنی، امید، امن اور بھائی چارے کے اس پیغام کو قومی یکجہتی کا استعارہ قرار دیا ہے۔