انسدادِ دہشت گردی کی عدالت راولپنڈی میں نومبر احتجاج کیس کی سماعت جج امجد علی شاہ نے کی جس میں علیمہ خان کی غیر حاضری پر عدالت نے دوبارہ ناقابلِ ضمانت وارنٹ گرفتاری جاری کر دیے۔ سماعت کے دوران پراسیکیوشن کی جانب سے پانچ گواہان اور مالِ مقدمہ عدالت میں پیش کیا گیا جبکہ مقدمے کے دس ملزمان عدالت میں موجود تھے۔ علیمہ خان تاہم عدالت میں پیش نہ ہو سکیں اور ان کی جانب سے حاضری سے معافی کی کوئی درخواست بھی جمع نہیں کرائی گئی۔ عدالت نے ایس پی راول سعد ارشد کو ہدایت دی کہ علیمہ خان کو گرفتار کر کے 22 اکتوبر کو عدالت میں پیش کیا جائے۔ عدالت نے علیمہ خان کے ضامن کے بھی ناقابلِ ضمانت وارنٹ گرفتاری جاری کیے اور شوکاز نوٹس جاری کرتے ہوئے ضامن کی جائیداد سے متعلق دستاویزات کی تصدیق کے لیے ڈپٹی کمشنر راولپنڈی کو فوری طور پر بھیجنے کی ہدایت کی۔ ذرائع کے مطابق عدالت نے آئندہ سماعت پر تمام گواہان کے بیانات قلمبند کرنے کی بھی ہدایت دی ہے۔