وزیراعظم شہباز شریف نے ملک بھر میں گھریلو صارفین کے لیے گیس کنکشنز کھولنے کا اعلان کردیا۔ اسلام آباد میں آر ایل این جی گیس کنکشنز کے اجرا کی تقریب سے خطاب کرتے ہوئے وزیراعظم کا کہنا تھا گھریلو صارفین کے لیے گیس کنکشنز اہم تقاضا تھا۔ شہباز شریف نے کہا کہ حکومت نے ملک بھر میں گھریلو صارفین کے لیے گیس کنکشنز کھولنے کا فیصلہ کیا ہے۔ انہوں نے کہا کہ 2022 میں پی ڈی ایم حکومت کے دوران گیس کی فراہمی ایک بڑا چیلنج تھا، عوام کا یہ مطالبہ تھا کہ گیس کنکشنز کا اجرا کیا جائے لیکن اس وقت گیس دستیاب نہیں تھی اس لیے عوام سے معذرت کرنا پڑی۔ وزیراعظم نے بتایا کہ نئے گیس کنکشنز کے لیے لاکھوں درخواستیں موصول ہوچکی ہیں، آج گیس کنکشنز کی بحالی سے عوام کا دیرینہ مطالبہ پورا ہوگیا ہے۔ شہباز شریف کا کہنا تھا 2013 میں لوڈشیڈنگ کا دورانیہ 20 گھنٹے سے زائد تھا، حکومت نے ملک سے اندھیروں کے خاتمے کیلیے خصوصی اقدامات کیے، ہم نے شبانہ روز محنت کرکے ملک کو ترقی کی راہ پر گامزن کرنا ہے۔