پاک فوج کے ترجمان لیفٹیننٹ جنرل احمد شریف چوہدری نے کہا ہے کہ پاک فوج دفاعِ وطن کے لیے ہر لمحہ تیار اور پرعزم ہے کسی بھی بیرونی جارحیت کا جواب سخت اور مؤثر انداز میں دیا جائے گا۔ ایبٹ آباد میں مختلف جامعات کے اساتذہ اور طلبا سے خصوصی نشست کے دوران گفتگو کرتے ہوئے ڈی جی آئی ایس پی آر نے حالیہ پاک افغان کشیدگی، ملکی سیکیورٹی صورتحال اور معرکہ حق سمیت اہم امور پر تبادلہ خیال کیا۔ لیفٹیننٹ جنرل احمد شریف چوہدری نے کہا کہ پاکستان نے دہشت گردی اور فتنۂ الخوارج کے خلاف مؤثر اقدامات کیے ہیں اور پاک فوج قومی سلامتی، امن و استحکام کے لیے اپنی ذمہ داریاں پوری کر رہی ہے۔ اس موقع پر طلبا اور اساتذہ کی بڑی تعداد نے شرکت کی اور شہداء و غازیانِ وطن کو زبردست خراجِ تحسین پیش کیا۔ہزارہ یونیورسٹی کے وائس چانسلر ڈاکٹر اکرام اللہ خان نے کہا کہ وطن سے محبت کا حقیقی استعارہ پاک فوج ہے جو ہمیشہ محاذِ اول پر رہتی ہے اور قوم ان کے شانہ بشانہ کھڑی ہے۔ اساتذہ نے اس موقع پر کہا کہ دشمن عناصر نوجوانوں کے ذہنوں کو گمراہ کرنے کی کوشش کر رہے ہیں اس لیے ضروری ہے کہ نوجوانوں کو درست اور مصدقہ معلومات فراہم کی جائیں۔