سیکیورٹی فورسز نے پاک افغان سرحد پر خوارج دہشت گردوں کی دراندازی کی کوشش ناکام بناتے ہوئے 4 خودکش بمباروں سمیت بھارتی سرپرستی یافتہ فتنہ الخوارج کو ہلاک کردیا۔
آئی ایس پی آر کے مطابق 24 اور 25 اکتوبر کو 2 بڑے دہشت گرد گروہوں نے پاک افغان سرحد عبور کرنےکی کوشش کی، سیکیورٹی فورسز نے دراندازی کی کوششیں ناکام بناتے ہوئے 15 دہشت گردوں کو ہلاک کردیا۔
آئی ایس پی آر کے مطابق غاخی کے علاقے ضلع کرم اور اسپن وام شمالی وزیرستان میں خوارج کے دو گروہوں کی مشکوک حرکات نوٹ کیں گئیں، خوارج پاکستان میں داخل ہونے کی کوشش کر رہے تھے، سیکیورٹی فورسز نے خوارج کےگروہوں کو بروقت اور مؤثر کارروائی کے دوران نشانہ بنایا۔
آئی ایس پی آر کے مطابق اسپن وام شمالی وزیرستان میں ہلاک 15دہشت گردوں میں 4 خودکش بمبار بھی شامل تھے۔ آئی ایس پی آر کا کہنا ہے کہ غاخی، ضلع کرم میں مزید 10 دہشت گرد ہلاک کیےگئے۔
شدید فائرنگ کے تبادلے کے دوران 5 بہادر سپوتوں نے جام شہادت نوش کیا۔ شہدا میں حوالدار منظور حسین، سپاہی نعمان الیاس کیانی، سپاہی محمد عدیل، سپاہی شاہجہاں اور سپاہی علی اصغر شامل ہیں۔
آئی ایس پی آر کے مطابق ہلاک دہشت گرد بھارتی سرپرستی یافتہ فتنہ الخوارج سے تعلق رکھتے تھے۔ ہلاک دہشت گردوں سےبھاری مقدار میں اسلحہ، گولہ بارود اور دھماکا خیز مواد برآمد ہوا۔
آئی ایس پی آر کا کہنا ہےکہ فتنہ الخوارج کی دراندازی کے واقعات ایسے وقت ہو رہے ہیں جب پاکستان اور افغانستان کے وفود ترکیے میں مذاکرات میں مصروف ہیں۔ دراندازی کے واقعات عبوری افغان حکومت کے دہشت گردی سے متعلق ارادوں پر سنجیدہ سوالات اٹھاتے ہیں۔
آئی ایس پی آر کے مطابق پاکستان بارہا عبوری افغان حکومت سے مطالبہ کرچکا ہے کہ وہ اپنی سرحدی نگرانی کو مؤثر بنائے۔ افغانستان دوحہ معاہدے کے تحت اپنی ذمہ داریاں پوری کرے۔ افغانستان اپنی سرزمین کو خوارج کے ذریعے پاکستان کے خلاف استعمال ہونے سے روکے۔
آئی ایس پی آر کا کہنا ہے کہ پاکستان کی سیکیورٹی فورسز اپنی سرحدوں کے دفاع کے لیے پرعزم اور ثابت قدم ہیں۔ ہمارے بہادر جوانوں کی قربانیاں دہشت گردی کے مکمل خاتمے کے عزم کو مزید مضبوط کرتی ہیں۔ کسی بھی بھارتی سرپرستی یافتہ خوارج کے خاتمے کے لیے علاقے میں کلیئرئس آپریشن جاری ہیں۔
دوسری جانب وفاقی وزیرِ داخلہ محسن نقوی نے پاک افغان سرحد سے فتنۂ خوارج کی دراندازی کی کوششیں ناکام بنانے پر سیکیورٹی فورسز کو زبردست الفاظ میں خراجِ تحسین پیش کیا ہے۔
محسن نقوی نے کہا کہ قوم کو اپنی سیکیورٹی فورسز کی پیشہ ورانہ مہارت، جرات اور بہادری پر فخر ہے، پوری قوم اپنے غیور سپاہیوں کے شانہ بشانہ کھڑی ہے۔
وزیرِ داخلہ نے خوارج کے خلاف آپریشنز میں جامِ شہادت نوش کرنے والے 5 جوانوں کو خراجِ عقیدت پیش کرتے ہوئے کہا کہ بہادر سپوتوں نے وطنِ عزیز پر جانیں نچھاور کر کے دشمن کے ناپاک عزائم کو ناکام بنایا۔ شہداء کی عظیم قربانیوں کو قوم سلام پیش کرتی ہے اور ان کے اہلِ خانہ کو خراجِ عقیدت پیش کیا جاتا ہے۔