وزیراعظم محمد شہباز شریف نے ترکیہ کے 102ویں یومِ جمہوریہ کے موقع پر ترک عوام اور صدر رجب طیب ایردوان کو مبارکباد پیش کرتے ہوئے کہا ہے کہ پاکستان اور ترکیہ کے تعلقات اسٹریٹجک شراکت داری کے ایک نئے دور میں داخل ہو چکے ہیں۔ وزیراعظم نے اپنے پیغام میں کہا کہ وہ پاکستانی عوام کی جانب سے پیارے بھائی صدر رجب طیب اور ترکیہ کے برادر عوام کو دلی مبارکباد پیش کرتے ہیں۔ انہوں نے کہا کہ کئی دہائیوں میںترک صدر کی جرات مندانہ اور متحرک قیادت کے باعث ترکیہ نے معاشی بحالی اور ترقی میں نمایاں کامیابیاں حاصل کیں جنہیں عالمی سطح پر بھرپور پذیرائی ملی ہے۔ ان کا کہنا تھا کہ پاکستان کو ترک عوام کی کامیابیوں پر فخر ہے اور دونوں ممالک عقیدے، تاریخ اور بھائی چارے کے اٹوٹ رشتوں میں منسلک ہیں جو جغرافیائی حدود اور وقت کی قید سے ماورا ہیں۔ شہباز شریف نے کہا کہ دونوں ممالک مشترکہ مفاد کے شعبوں میں دیرینہ تعلقات کو مزید وسعت دینے کے لیے پرعزم ہیں اور پاکستان ترکیہ کے ترقی کے سفر میں ہمیشہ اس کے ساتھ کھڑا رہے گا۔