خیبرپختونخوا اسمبلی میں سینیٹ کی جنرل نشست پر ضمنی انتخاب کے لیے پولنگ کا عمل جاری ہے۔ یہ نشست پاکستان تحریک انصاف کے رہنما سینیٹر شبلی فراز کی نااہلی کے بعد خالی ہوئی تھی۔ پولنگ صوبائی اسمبلی کے جرگہ ہال میں ہو رہی ہے جو صبح 9 بجے شروع ہوئی اور شام 4 بجے تک بلا تعطل جاری رہے گی۔ ضمنی انتخاب میں پاکستان تحریک انصاف کے امیدوار خرم ذیشان، اپوزیشن کے متفقہ امیدوار تاج محمد آفریدی اور عرفان سلیم کے درمیان مقابلہ ہے۔ ذرائع کے مطابق دو امیدوار، عابد خان یوسفزئی اور نثار خان، گزشتہ روز دستبردار ہو گئے تھے۔ پولنگ کے دوران پہلا ووٹ حلقہ پی کے-115 کے رکن احسان اللہ خان نے کاسٹ کیا جبکہ اقلیتی رکن گورپال سنگھ نے بھی اپنا ووٹ ڈالا۔ خیبرپختونخوا اسمبلی میں اس وقت حکومت کے 92 جبکہ اپوزیشن کے 52 اراکین ہیں اور ووٹنگ کا عمل پرامن طور پر جاری ہے۔