بھارت کی حکومت اور کرکٹ بورڈ نے 19 سال سے کم عمر کے لڑکوں کو بھی سیاست کی بھینٹ چڑھا دیا ہے۔ آج دبئی میں ایشیا کپ انڈر 19 ٹورنامنٹ کے میچ میں بھارت کے کھلاڑیوں نے پھر پاکستانی کھلاڑیوں سے ہاتھ نہ ملانے کی اپنے بڑوں کی افسوسناک ریت جاری رکھی۔ میچ کے دوران دونوں ٹیموں کے کھلاڑیوں نے آپس میں کوئی بات چیت نہیں کی اور کچھ مواقع پر گرما گرمی بھی ہوئی، اس سے پہلے ٹاس پر بھی اور میچ کے بعد بھی بھارتی ٹیم نے پاکستانی کھلاڑیوں سے ہاتھ نہیں ملایا۔ ایسا لگا جیسے ان لڑکوں کو بھی بڑوں نے سبق سکھا کے بھیجا تھا کہ ہاتھ نہیں ملانا۔ میچ کے دوران ایک وقت ایسا بھی آیا کہ پاکستان کے ایک بیٹسمین کہ جوتے کی لیس کھل گئی تو انہوں نے ایک بھارتی کھلاڑی اس سے مدد مانگی اور اس نے بیٹھ کر ان کی لیس باندھی جس پر جو تماشائی گراؤنڈ پر تھے انہوں نے تالیاں بجا کر ان کے اسپورٹس مین شپ کی داد دی۔ پاکستانی کھلاڑیوں سے ہاتھ نہ ملانے کا سلسلہ اس سال ہونے والے ایشیا کپ بھارت کی ٹیم نے شروع کیا اور اب ان کی انڈر 19 کی ٹیم کو بھی یہی کرنا پڑ رہا ہے۔