آذربائیجان میں 63 سالہ خاتون نے کئی برس تک اولاد نہ ہونے کے بعد جدید طبی علاج کی بدولت ایک صحت مند بچے کو جنم دیا جسے تولیدی طب کے شعبے میں ایک غیر معمولی کامیابی قرار دیا جا رہا ہے۔ یہ خوشخبری ڈاکٹر آف فلاسفی اِن میڈیسن، ڈاکٹر ناطق مہرموف نے اپنے سوشل میڈیا اکاؤنٹ کے ذریعے شیئر کی۔ ان کے مطابق خاتون کئی سال تک قدرتی طور پر حاملہ نہ ہو سکیں تاہم کامیاب طبی علاج کے بعد وہ ماں بننے میں کامیاب رہیں۔ ڈاکٹر ناطق مہرموف نے اپنے بیان میں کہا اللہ تعالیٰ کے فضل و کرم سے ہم نے ضروری علاج مکمل کیا اور ہماری 63 سالہ مریضہ نے برسوں کے انتظار کے بعد اپنے بچے کو پہلی بار گود میں لیا۔ اللہ تعالیٰ اس بچے کی حفاظت فرمائے۔ ہمیں بے حد خوشی ہے کہ ہماری کوششیں کامیاب رہیں اور ہم اس خاندان کی خوشیوں کا سبب بن سکے۔ ڈاکٹر کے مطابق یہ واقعہ جدید تولیدی طب کی ترقی کا ایک اہم ثبوت ہے جس نے ایک ایسے خواب کو حقیقت میں بدل دیا جو کئی برسوں سے ادھورا تھا۔ واضح رہے کہ 63 سال کی عمر میں بچے کی پیدائش انتہائی نایاب واقعہ تصور کیا جاتا ہے اسی لیے اس خبر نے عوامی سطح پر خاصی توجہ حاصل کی ہے۔