پنجاب میں اسموگ کے خاتمے اور ماحولیاتی آلودگی پر قابو پانے کے لیے صوبے بھر میں دھواں چھوڑنے والی تمام سرکاری گاڑیاں فوری طور پر بند کرنے کا فیصلہ کیا گیا ہے۔ وزیرِ اعلیٰ پنجاب مریم نواز کی ہدایت پر سینئر وزیر مریم اورنگزیب کی زیرِ صدارت منعقدہ اجلاس میں اس اقدام کی منظوری دی گئی۔ اجلاس کے دوران اسموگ کی روک تھام کے لیے جاری کردہ ضوابط (ایس او پیز) پر سخت عملدرآمد کا فیصلہ کیا گیا، جس کے تحت فصلوں کی باقیات جلانے، آلودگی کا باعث بننے والے کارخانوں، اینٹوں کے بھٹوں اور دھواں دینے والی تمام گاڑیوں کے خلاف بلا امتیاز کریک ڈاؤن کیا جائے گا۔ اس کے علاوہ کوڑا کرکٹ اور پلاسٹک جلانے والوں پر بھاری جرمانے عائد کرنے کی منظوری دی گئی ہے، جبکہ ویسٹ برننگ کی خلاف ورزی میں ملوث 'ستھرا پنجاب' کمپنی کا ٹھیکہ منسوخ کرنے کا فیصلہ کیا گیا ہے۔ اجلاس میں باربی کیو پوائنٹس اور فوڈ اسٹریٹس میں ماحولیاتی تحفظ کے قوانین کی پاسداری یقینی بنانے کی تاکید کی گئی ہے اور خلاف ورزی کے مرتکب ریسٹورنٹس کو سیل کرنے کا حکم دیا گیا ہے۔