امریکی اخبار کے دعوے کے مطابق پینٹاگون نے مشرقِ وسطیٰ میں امریکی فوجیوں کی تعیناتی میں 2027 تک توسیع کردی ہے، جسے ایران کے ساتھ جاری جنگ کے طویل ہونے کا اشارہ قرار دیا جا رہا ہے۔ رپورٹ کے مطابق وزیر دفاع پیٹ ہیگسیتھ کی جانب سے فوجی تعیناتیوں کی مدت بڑھانا اس بات کی علامت ہے کہ یہ تنازع اگلے سال بھی جاری رہ سکتا ہے۔ امریکی حکام کا کہنا ہے کہ یہ قدم ایک غیر محدود فوجی حکمت عملی کا حصہ ہے تاکہ صدر ٹرمپ کو مختلف آپشنز فراہم کیے جا سکیں۔ دوسری جانب امریکی اخبار کا کہنا ہے کہ صدر ٹرمپ نے نجی طور پر اپنے معاونین سے ایران کے ساتھ جنگ ختم کرنے کے اعلان پر مشاورت کی ہے کیونکہ وہ ذاتی طور پر اس کے خاتمے کے حق میں ہیں۔ انہیں یقین ہے کہ اقتصادی دباؤ ایرانی حکومت کو اپنے جوہری پروگرام سے دستبردار ہونے پر مجبور کر دے گا۔ تاہم معاونین نے صدر کو خبردار کیا ہے کہ اس جنگ کے طول پکڑنے سے آنے والے وسط مدتی انتخابات میں ریپبلکن پارٹی کو شکست کا سامنا کرنا پڑ سکتا ہے، اسی لیے ٹرمپ انتظامیہ چاہتی ہے کہ مڈٹرم الیکشنز تک ایران جنگ خاموشی سے جاری رہے۔