پاکستان کی قومی ٹی ٹوئنٹی ٹیم کے نئے کپتان صاحبزادہ فرحان اور سری لنکن ٹیم کے کپتان کوشال مینڈس نے ٹی ٹوئنٹی سیریز کی ٹرافی کی رونمائی کر دی ہے۔ ٹرافی کی رونمائی کی تقریب پنڈی کرکٹ اسٹیڈیم میں منعقد ہوئی۔ اس موقع پر گفتگو کرتے ہوئے قومی ٹی ٹوئنٹی ٹیم کے کپتان صاحبزادہ فرحان نے کہا کہ انہیں پہلی مرتبہ بطور کپتان پاکستان کی نمائندگی کا موقع مل رہا ہے جس پر وہ بہت پرامید ہیں۔ انہوں نے کہا کہ ان کے لیے یہ انتہائی باعثِ فخر بات ہے کہ انہیں یہ اہم ذمہ داری دی گئی ہے اور وہ بھرپور کوشش کریں گے کہ ملک کے لیے بطور کپتان بہترین کارکردگی کا مظاہرہ کرسکیں۔ صاحبزادہ فرحان کا مزید کہنا تھا کہ بطور کپتان کھلاڑی پر اضافی دباؤ ضرور ہوتا ہے، لیکن ان کی کوشش ہوگی کہ وہ فرنٹ سے ٹیم کی قیادت کرتے ہوئے لیڈنگ کردار ادا کریں اور باقی کھلاڑیوں کے لیے ایک بہترین مثال قائم کریں۔