مشرق وسطیٰ میں ایران کے خلاف امریکی جنگ سے متعلق خدشات بڑھنے کے باعث عالمی منڈی میں خام تیل کی قیمتوں میں تقریباً 4 فیصد اضافہ ہوگیا۔
رپورٹس کے مطابق برینٹ خام تیل کی قیمت 4.08 ڈالر اضافے کے بعد 104.28 ڈالر فی بیرل ہوگئی، جبکہ امریکی خام تیل ویسٹ ٹیکساس انٹرمیڈیٹ (ڈبلیو ٹی آئی) 3.21 ڈالر مہنگا ہوکر 91.49 ڈالر فی بیرل پر پہنچ گیا۔
ممکنہ امریکی حملوں کے خدشات کے باعث کاروبار کے دوران دونوں اقسام کے خام تیل کی قیمتوں میں 5 ڈالر فی بیرل سے زیادہ اضافہ بھی ریکارڈ کیا گیا۔
دوسری جانب ایران کے ساتھ تنازع آٹھویں ماہ میں داخل ہونے کے باعث خلیج اور آبنائے ہرمز میں تیل بردار جہازوں کی آمدورفت کو لاحق خطرات بڑھ گئے ہیں۔ گزشتہ ہفتے آبنائے ہرمز سے گزرنے والے آئل ٹینکروں پر حملے جنگ شروع ہونے کے بعد بلند ترین سطح پر پہنچ گئے، جس سے عالمی تیل کی سپلائی کے حوالے سے خدشات مزید بڑھ گئے ہیں۔