بھارتی اداکارہ ایشوریہ رائے اپنی بیٹی آرادھیا بچن کی پیدائش کے بعد سے کبھی اکیلی نظر نہیں آئیں، وہ جہاں جاتی ہیں ان کی بیٹی ان کے ہمراہ ہوتی ہے۔ جس پر اکثر لوگ ان سے یہ سوال کرتے ہیں کہ آپ ہر وقت آرادھیا کو اپنے ساتھ کیوں رکھتی ہیں؟ جس کا نہایت ہی خوبصورتی سے جواب دیتے ہوئے سابقہ مس ورلڈ نے اسکی وجہ بتا دی۔ بھارتی میڈیا کو انٹرویو دیتے ہوئے ایشوریہ نے کہا کہ، "میں اسے ہر جگہ اپنے ساتھ لے جاتی ہوں، کیونکہ میری بیٹی میری زندگی کا حصہ ہے، مجھے خوشی ہوتی ہے کہ میں اس کی دیکھ بھال کےلیے وقت نکالتی ہوں"۔ انہوں نے آرادھیا کے بچپن کی بات کرتے ہوئے کہا کہ، اب تو وہ عام سی لڑکی کی طرح اسکول جاتی ہے لیکن جب چھوٹی تھی تو میں اسے دوسرے بچوں کے جیسے پلے پارک لے جاتی تھی۔ حالانکہ ممبئی میں رہتے ہوئے یہ کام زرا مشکل ہوجاتا ہے، کیونکہ پارک کے باہر لوگ آپ کو پہچان لیتے ہیں۔ میڈیا کی جانب سے پریشان کئے جانے پر ایشوریہ نے بتایا کہ، میں نے آرادھیا کو سمجھایا ہوا ہے کہ اسے نارمل زندگی گزارنی ہوگی۔ چونکہ اس نے بچپن سے ہی یہ سب دیکھا ہے، تو جب ہجوم زیادہ ہوتا ہے تو وہ خاموشی سے کھڑے رہ کے سب دیکھتی ہے، اور لوگوں کی چیخ و پکار سن کر گھبرا کے مجھ سے چمٹ جاتی ہے۔