رواں ماہ اپنی 33 ویں سالگرہ منانے والی اداکارہ نتاشا سٹینکووچ نے کہا ہے کہ وہ دوبارہ محبت میں گرفتار ہونے کے لیے تیار ہیں۔اداکارہ نے جولائی 2024 میں انڈین کرکٹر ہاردک پانڈیا سے طلاق حاصل کر لی تھی۔ سابقہ ​​جوڑے نے اپنے بیٹے آگستیہ کی مل کر پرورش کے لیے رابطے قائم رکھنے کا فیصلہ کیا تھا۔نتاشا سٹینکووچ نے ٹائمز آف انڈیا کو ایک انٹرویو میں پارٹنرشپس یا شادی کے بارے میں اپنے خیالات کھل کر بتائے۔انہوں نے کہا کہ ’جب میں آنے والے وقت کی طرف دیکھتی ہوں تو میں یقینی طور پر نئے تجربات، مواقع اور شاید محبت کے لیے دل و دماغ کھلے رکھے ہوئے ہوں۔ میں اس (پیار کرنے) کی مخالف نہیں ہوں۔ جو بھی زندگی میرے راستے پر لاتی ہے اسے قبول کرنا چاہتی ہوں۔ میرا ماننا ہے کہ اچھا تعلق فطری طور پر ہوتا ہے جب درست وقت ہو۔‘ماڈل و اداکارہ نے مزید کہا کہ ’میں بامعنی رشتوں کی قدر کرتی ہوں، جو اعتماد اور افہام و تفہیم پر قائم ہوتے ہیں۔ میرے خیال میں محبت کو میرے سفر کی توصیف کرنا چاہیے نہ کہ خود اس کے معانی سمجھائے۔‘ہاردک پانڈیا سے طلاق کے حوالے سے گفتگو میں نتاشا سٹینکووچ نے اعتراف کیا کہ گزرا سال ان کے لیے ’کافی چیلنجنگ‘ تھا۔انہوں نے کہا کہ ’پچھلا سال کافی مشکل تھا اور میں اس کے لیے شکرگزار ہوں۔ جیسے جیسے ہم چیلنجوں سے گزرتے ہیں، سمجھدار ہوتے جاتے ہیں، اور مجھے بس یہ پسند ہے۔ بہت سے تجربات (اچھے اور برے) تھے، اس لیے مجھے یقین ہے کہ ہم عمر کے ساتھ نہیں بلکہ تجربات سے پروان چڑھتے ہیں۔‘ماڈل و اداکارہ نتاشا نے کہا کہ ’میں بامعنی رشتوں کی قدر کرتی ہوں۔‘ فائل فوٹو: این ڈی ٹی وینتاشا سٹینکووچ نے زندگی کے اتار چڑھاؤ پر روشنی ڈالی۔انہوں نے کہا کہ چیلنجوں کا مثبت ذہن کے ساتھ جواب دینا ہی آگے بڑھنے کے راستہ کو ہموار کرتا ہے۔نتاشا سٹانکووچ نے کہا کہ ’زندگی ہمیشہ منصوبہ بندی کے مطابق نہیں گزرتی، لیکن آپ چیلنجوں کا جواب کیسے دیتے ہیں اس سے آپ کے اختیار کیے راستے کا پتہ چلتا ہے۔ کسی کو غلط ثابت کرنے کی کوشش نہ کریں، کیونکہ اس سے صرف آپ کا سکون ہی متاثر ہو گا۔ یہ اس کے قابل نہیں۔ بس معاف کر دیں اور آگے بڑھیں۔‘نتاشا سٹینکووچ اور ہاردک پانڈیا نے مئی 2020 میں شادی کی تھی۔سابق جوڑے کی شادی کے چار سال بعد طلاق ہو گئی تھی۔ اپنی علیحدگی کا مشترکہ اعلان کرتے ہوئے جوڑی نے اپنے اپنے انسٹاگرام ہینڈلز پر ایک بیان جاری کیا۔ انہوں نے علیحدگی کو ایک ’مُشکل فیصلہ‘ قرار دیا تھا۔