غزہ میں اسرائیل کی بربریت جاری ہے، تازہ فضائی حملوں میں مزید 44 فلسطینی شہید ہوگئے۔ غیر ملکی خبر رساں ایجنسی کے مطابق غزہ کی سول ڈیفنس ایجنسی کا کہنا ہے کہ اتوار کو اسرائیلی فضائی حملوں میں کم از کم 44 افراد شہید ہوئے۔ اسرائیلی فوج نے 18 مارچ کو غزہ جنگ بندی معاہدہ توڑتے ہوئے غزہ پر بدترین بمباری شروع کردی تھی جس کے نتیجے میں 18 سے مارچ سے اب تک غزہ میں ایک ہزار سے زائد افراد شہید ہوچکے ہیں۔سول ڈیفنس ایجنسی کے ترجمان محمود بصل کے مطابق اتوار کی صبح سے اسرائیلی فضائی حملوں کے نتیجے میں شہید افراد کی تعداد کم از کم 44 ہے، جن میں سے 21 کا تعلق شہر خان یونس سے ہے۔حماس نے اس حملے کی مذمت کرتے ہوئے کہا کہ جان بوجھ کر بچوں کا قتل کیا جارہا ہے۔دوسری جانب غزہ سے مقبوضہ فلسطینی علاقوں پر راکٹ حملے کے بعد مقبوضہ عسقلان میں نقصانات کی اطلاعات ہیں۔اسرائیلی میڈیا کے مطابق غزہ سے اسرائیلی علاقوں کی جانب 10 راکٹ داغے گئے جو کہ گزشتہ 10 ماہ کے دوران غزہ سے ہونے والا سب سے بڑا راکٹ حملہ ہے۔فلسطینی مزاحمتی تنظیم حماس کے عسکری ونگ القسام بریگیڈز نے اس راکٹ حملے کی ذمہ داری قبول کی ہے۔اسرائیلی فوج کے مطابق غزہ سے داغے جانے والے اکثر راکٹوں کو فضا میں ہی تباہ کردیا گیا۔ اسرائیل کی ریسکیو سروس کے مطابق راکٹ حملے کے نتیجے میں 3 افراد زخمی ہوئے ہیں۔